18+
“Приморскай” МУТ бастакы нүөмэрдээх ыстаадатыгар бара сырыттыбыт. Онно сайыҥҥы сынньалаҥҥа оскуола оҕолорун, почтаны уонна бородуукталарын тиэртибит. Ыстаада биригэдьиирин Никитин Иннокентий Гаврильевыһы кытта, кинилиин бииргэ үөскээбит, улааппыт, үөлээннээҕим буолан, атах тэпсэн олорон кэпсэттибит.
Тордох таһыгар таба хаайа сылдьар оҕолору көрөн, киһим мүчүк гынна уонна бэрт ырааҕы толкуйдаан дуу, өйдөөн дуу, сир диэки көрөн сөҥ түһэн олордо. «Кеша, тугу толкуйдаатын?”, – диэн ыйыттым. “Ээ, оттон, өйдүүгүн ини, оҕо эрдэхпитинэ биһиги эмиэ ити оҕолор курдук элбэхтик таба хаайбыт, мэниктээбит дьоммут”, – диэн киһим хоруйдаата. Кеша ону санаабытын сэрэйбитим уонна ити оҕолор тустарынан ыйыталаһарга быһаарынным.
– Кэлиҥҥи кэмҥэ сайыҥҥы сынньалаҥҥа оҕо ыстаадаҕа үлэлии тахсара элбээтэ, бу билигин алта оҕону аҕаллым. Урукку кэмҥэ эн оҕолоргун Марфушалаах Кешаны эрэ көрөөччүбүн. Кинилэр ыстаадаҕа эһигини кытта тэҥҥэ хас саастарыттан сылдьыспыттарай?
– Үс саастарыттан ыла сайын аайы кэлэллэр, билигин кыыһым уон түөрт сааһа, уолум – уон иккитэ. Хамнастаах үлэһиттэр, күһүн аайы хамнас ылаллар. Быйыл ыстаадаҕа эбии түөрт оҕо кэллэ.
– Кинилэр урут сылдьааччылар дуо?
– Икки уол – Черкашин Захар уонна Рожин Алгыс – урут үлэлии сылдьыбыт оҕолор. Оттон ити икки саҥа үлэлии кэлбит оҕолор – Винокурова Капа уонна Стручков Костя диэннэр. Уопсайынан МУТ дириэктэрэ көҕүлээһининэн, кини хамнастарын үчүгэйдик төлүүр буолан, оҕо үлэҕэ, таба иитиитигэр интириэһэ үрдээн эрэр.
– Билигин хамнас чааһынан дьыала хайдаҕый?
– Уопсайынан хамнас үрдээн дьон санаата, үлэҕэ сыһыана үчүгэй. МУТ дириэктэрэ Владимир Владимирович Алексеев тиэхиникэнэн хаҥатта диэххэ сөп. Ол курдук саас, сайын саҥа «Ураалларынан” ыстаадалар сайылыыр мастарын тастарар, маһы икки сиргэ түһэттэрэр, ону биһиги “Бураннарынан” тиийэн сайын көһөр маршруппутунан тарҕатан кэбиһэбит.
– Табаҕыт туруга хайдаҕый?
– Үчүгэй, арай эһэ, бөрө кэлэн аймыыр ардыгар. Ону биһиги түүннэри-күнүстэри кэтиир буолан, сонно тутатына кыйдыыбыт. Кыһыныгар куһаҕан буолар, тыал игин түстэҕинэ, табаларбытын кэтээбэтэхпитинэ бөрөлөр үөрүнэн кэлэн аймаан, тардан барбыт буолааччылар, табаларбытын Хара-Уулаах очуостарын үрдүлэриттэн хомуйааччыбыт, урут дьаат диэн биэрээччилэр, онно бөрө өлөөччү, билигин оннук биэрбэттэр, биэрэллэрэ буоллар үчүгэй буолуо этэ.
Бу кэпсэппит киһим Никитин Иннокентий Гаврильевич диэн табаһыт, бэрт холку саҥалаах, наҕыл туттуулаах, саас ортотун ааһан эрэр Никитиннэр удьуор табаһыт династияларын салҕыыр дьонтон биирдэстэринэн буолар.
Урут бу ыстаадаҕа Никитин Алексей Николаевич биригэдьиирдии сылдьыбыта, ол кэмтэн ыла кини бу уолу, Кешаны, бэйэм оннубар хаалларыам диэн этэрэ. Кырдьаҕас өр сылларга иитэн, такайан, үөрэтэн, бэйэтин солбугун эрдэттэн бэлэмнээн, билигин бочуоттаах сынньалаҥҥа олорор. Алексей Николаевич – “Норуоттар доҕордоһуулара” орден кавалера, таба иитиитигэр көдьүүстээх үлэтин иһин түөһүгэр бэрт элбэх мэтээллээх киһиннэн буолар.
Бу курдук ыстаада дьонун кытары ирэ-хоро кэпсэтэн, хонон-өрөөн, сынньанан баран, төттөрү Хара-Уулаахха айаммытыгар туруннубут.
Федот АММОСОВ
Хара-Уулаах нэһ.
Рукописи не рецензируются и не возвращаются.
При цитировании материалов ссылка на газету обязательна.
За содержание и достоверность объявлений редакция не отвечает.
Мнение авторов может не совпадать с мнением редакции.
E-mail: info@mayak-arc.ru 18+
© Информационное агентство Инфорос, 2010 – 2025