18+
Олоҥхо – саха киһитин кута-сүрэ иитиллэр биһигэ. Олорон ааспыт улуу дьоннорбут омук быһыытынан ураты айылгыбытын хомоҕой тылларынан, өркөн өйдөрүнэн улуу олоҥхолоругар ойуулаан кэбиспиттэрэ дириҥник өйдөөтөххө омук быһыытынан тыыннаах хаалар суолбут тускула эбит. Сахалар бэйэбитин айылҕа оҕолоро дэнэбит. Кырдьыга даҕаны өркөн өйдөөх өбүгэлэрбит үгүс үйэ тухары төгүрүк сылга тоҕус ыйдаах томороон тымныылыын күрэстэһэн, тыйыс айылҕабыт хас уларыйыытын кэтээн көрөн, ымпыгын-чымпыгын билэн, кинилиин биир тыынынан өйдөһөн олорбуттарын түмүгэр, омук быһыытынан симэлийбэккэ, ийэ тылбытын сүтэрбэккэ олорор олохпутугар ыйынньык буолуох сүдү олоҥхобутун 21 үйэҕэ илдьэ кэлбиппитин улуу айымньыбыт аан дойду таһымыгар тахсыбыта да туоһулуур.
Ол курдук, Бороҕон нэһилиэгэр “Омолой” ЭКК үлэһиттэрэ олоҥхо ырыатын-тойугун, тылын-өһүн үүнэн эрэр көлүөнэни уһуйан, талааннарын арыйан таһаарар үлэни ыытар, нэһилиэк дьонун духуобунай култуурата сайдарыгар олоҥхо философиятын тарҕатар.
Оҕо хамсааһынын күнүн уонна Олоҥхо декадатын чэрчилэринэн Бороҕон орто оскуолатын алын сүһүөх үөрэнээччилэрэ “Ньургун Боотур” олоҥхоттон быһа тардыыны “Кэнчээри” оҕо саадын иитиллээччилэригэр туруоран көрдөрдүлэр. Ол кэннэ нэһилиэк олохтоохторун дьүүлүгэр таһаардылар. Олоҥхону бастакы көрдөрүүлэрэ буолан, сүрдээҕин кыһаллан, өрө көтөҕүүлээхтик, үрдүк таһымнаахтык кытыннылар. Ону таһынан “Мин дойдум – Олоҥхо дойдута” диэн уруһуй күрэҕэр кыттыыны ыллылар, Олоҥхоҕо анаммыт кинигэ быыстапкатын интириэһиргээн көрдүлэр, кинигэлэри аахтылар.
Арианна Никонова (2 кыл.), Коля Горохов (3 кыл.), Ньургун Стручков (4 кыл.) олоҥхону өйтөн ааҕан дьон биһирэбилин ылыахтарын ыллылар.
Сүрүн оруолларга бухатыырдар: Күн Дьирибинэ – Баир Слепцов (3 кыл.), Ньургун Боотур – Христофор Рожин (4 кыл.), Үрүҥ Уолан – Герман Никитин (3 кыл.). Үөһэ Дойду олохтоохторун толордулар: Люба Корякина (3 кыл.) – Адьына Сиэр Хотун, Саша Харитонов (1 кыл.) – Үрүҥ Аар Тойон. Орто Дойду олохтоохторо: Сабыйа Баай Хотун – Нарыйаана Стручкова (2 кыл.), сахалар – Мотя Рожина (3 кыл.), Оля Бурцева (2 кыл.), Ия Находкина (1 кыл.). Аллараа Дойду абааһылара – Уот Уһутаакы бухатыыр – Радмир Соловьев (2 кыл.), Кыыс Кыскыйдаана – Ия Находкина.
Олоҥхо түмүгүнэн оҕолор “Омолой” култуура кииниттэн Махтал сурук, Грамота, минньигэс туорт бэлэх туттулар. Күүс-көмө буоллулар таҥас-сап тигэн оҕолор төрөппүттэрэ уонна Аргунова Сардаана Васильевна. Өрүү да маннык күүс-көмө, араас тэрийиигэ тирэх буолуохтара диэн бигэ эрэллээхпит.
Эмма СЛЕПЦОВА,
Намы
Рукописи не рецензируются и не возвращаются.
При цитировании материалов ссылка на газету обязательна.
За содержание и достоверность объявлений редакция не отвечает.
Мнение авторов может не совпадать с мнением редакции.
E-mail: info@mayak-arc.ru 18+
© Информационное агентство Инфорос, 2010 – 2025