18+
Бэчээт күнүгэр аналлаах ыытыллыбыт тэрээһиннэр түмүктэннилэр. Дьаһал чэрчитинэн элбэх түмүк оҥоһулунна, саҥа соруктар туруорулуннулар. Ол туһунан бүгүн күндү ааҕааччыларбытыгар иһитиннэриэхпин баҕарабын.
Анал семинар кэмигэр Бэчээт уонна телерадиобиэрии департаменын салайааччыта Ф.П. Пестряков ордук болҕомтону кадр боппуруоһугар уурда. Манна миэстэтигэр оҕону оскуола сааһыттан суруналыыстыкаҕа интэриэһи үөскэтэр наадата тоһоҕолонно. Маныаха быйыл биһиги редакциябыт оҕо оскуола кэннинээҕи үөрэҕин Киинин кытта кыттыгас программата туһалыан сөп курдук санаатым. Ол курдук, хас оскуола аайыттан суруйар талааннаах, баҕалаах оҕолор сүүмэрдэммиттэрэ. Оҕолор бастакы үлэлэрин хаһыат Саҥа дьыллааҕы нүөмэригэр билсибиккит. Кырдьык, суруналыыстыка курдук ураты үлэни киһи барыта кыайбат. Онно эрдэттэн оҕону бэлэмнээн, саатар биир-икки ыччат ити хайысханан бардаҕына, ол биһиги ситиһиибит буолуо этэ. Ол иитэн таһаарбыт оҕобут, үөрэнэр кэмигэр өйөбүл буолан, дойдутугар үлэлии кэлэригэр усулуобуйа оҥорор соругу туруорунабыт.
Филипп Петрович иккис туруорбут боппуруоһунан оройуон хаһыаттарын «Сахамедиа» акционернай уопсастыбаҕа холбооһун туһунан буолла. Тэрилтэ салалтатын кытта көрсүһүү тэрилиннэ. 2013 сылга уопсастыбаҕа «Якутия», «Саха сирэ» уонна Саха-информационнай агенство кыттыспыттара. 2014 сылга тоҕус оройуон хаһыата бу бырайыакка киллэриллэр буолла: Алдан, Ленскэй, Өлүөхүмэ, Томпо, Хаҥалас, Амма, Мэҥэ-Хаҥалас, Нам уонна Чурапчы. Ол курдук, кинилэр нэдиэлэҕэ тахсар хаһыаттарыттан биир нүөмэрдэрэ «Саха сирэ» уонна «Якутия» республикатааҕы бөдөҥ хаһыаттарга анал сыһыарыынан тахсыа. Бу бырайыак биһирэннэҕинэ 2015 сылтан атын улуустар хаһыаттарын холбооһун барыа. Ол аата биһиги «Маяк Арктики» хаһыаппыт нэдиэлэҕэ үстэ тахсар буоллаҕына, икки нүөмэрэ бэйэбит типографиябытыгар, үһүс нүөмэрэ «Якутия» хаһыакка аҕыс балаһанан сыһыарыы быһыытынан буолуоҕа. Манна биири тоһоҕолоон бэлиэтиир наадалаах – кыттыгас буолуу информацияны эрэ тарҕатыыга сыһыаннаах, редакция туспа структуратынан миэстэтигэр хаалар. Сурутуу сыаната уларыйбат. Өссс биир холбоһук «Кэскил» оҕо издательствота буолар. Манна «Кэскил» и «Юность Севера» оҕо хаһыаттара киллэриллибиттэр.
Чуолаан хоту улуустарга Орто Халыматааҕы «Халыма долгуннара» хаһыат саҕалаабыт дьыалатын – улуус, нэһилиэк дьаһалталара, «Россия почтата» тэрилтэ уонна редакция бииргэ үлэлэрин сэҥээрии буолла. Бу туһунан кылгастык кэпсиир буоллахха, ити үс өрүт дуогабарга олоҕуран, нэһилиэк дьаһалтата куоппуйалыыр массыына атыылаһар, почта үлэһиттэрэ хаһыаты ити массыынаҕа куоппуйалааһыҥҥа ылсаллар, онтон редакция информациятын ыытар, оччотугар улуус хаһыата миэстэтигэр күнүгэр таһаараллар. Бу уопут биһиги Күһүүрбүтүгэр сөп түбэһиэх курдук. Маны нэһилиэк баһылыга А.Н. Винокурова өйүөн сөбө дуу диэн толкуйдуубун. Оччотугар саамай улахан нэһилиэнньэлээх сирбит олохтоохторун сибиэһэй, кырдьыктаах сонунунан хааччыйыа этибит дии саныыбын.
Салгыы правительство вице-премьера А.И. Борисов редактордары кытта көрсүһүүтүгэр «Сырдатар иһитиннэрэр ситимнэр – дойду, регион, оройуон индикатора буолаллар» – диэн сыанабыл биэрдэ. Ити аата хас биирдии нэһилиэнньэлээх пуун тугунан тыынан, хайдах үлэлээн-хамсаан, туох кыһалҕалаах буолара бэчээт нөҥүө биллэр. Урут уруккуттан «Хаһыат – оройуон сирэйэ» эбэтэр «Хаһыат – летопись» диэн өйдөбүл баар. Суруллубут суоруллубат. Ол иһин салалта өттүттэн СМИ-гэ ураты болҕомто баар буолуохтааҕа өйдөнөр. Ити эрээри, маны ханнык салалта хайдах ылынарыттан эмиэ үгүс тутулуктаах. Биһиги улууспутугар ааҕааччы өттүттэн хаһыакка улахан болҕомто баара үөрдэр. Сурутуу ахсаана түспэт.
Информация хас биирдии киһиэхэ кырдьыктаахтык уонна кэмигэр тириэрдиллиэхтээҕэ этилиннэ. Оройуон хаһыаттара олохтоох мероприятиелары, экономиканы суруйуунан эрэ муҥурдаммакка, дойду ыытар политикатын эмиэ кэмигэр тириэрдиэхтээхпитин санатта. Иккиһинэн, билигин хаһыаты тириэрдиигэ-таһыыга анаан «Россия почтатыгар» икки сөмөлүөт ылыллыбыта, өссө эбии улахан уйуктаах массыыналар кэлиэхтээхтэрэ этилиннэ. Улуус киинигэр сөмөлүөттэр тириэрдэр буоллахтарына, салгыы почта бөртөлүөтүнэн айанныырыгар олохтоох дьаһалталар ылсыахтарын наада. Онон үлэ бары эйгэҕэ ыытыллар. Ити дьон бэйэтин гражданскай быраабын туһанан информациянан көҥүллүк хааччылларыгар ананар.
Онон, күндү ааҕааччыларбыт, редакция коллектива эһиэхэ куруук биһигини кытта бииргэ хардыылаан иһэргитигэр махтанан туран, кытаанах доруобуйаны, күүстээх санааны баҕаран туран, бары бииргэ буолуохха диэн ыҥырабыт. Олохпут тупсарыгар эн, мин, кини, бэйэбит туруорсубатахпытына, үлэбитинэн-хамнаспытынан көмөлөспөтөхпүтүнэ – «Оччоҕо ким?» диэн ыйытык үөскүүрүн өйдүөх тустаахпыт. Суруйуҥ, кэлиҥ, кэпсэтиҥ, санааҕытын аһаҕастык этиҥ… «Хаһыат – эһиги куоласкыт» буоларын умнумаҥ.
Полина НИКОЛАЕВА,
Дьокуускай
Более 30 представителей средств массовой информации Якутии получили заслуженные награды в День российской печати в понедельник, в овальном Зале республики. Среди них и наш редактор-директор Полина Михайловна Николаева. Она награждена Почетной грамотой Правительства Республики Саха (Якутия) и Благодарственным письмом Администрации Президента и Правительства за заслуги в области социально-экономического развития Якутии и за содействие в проведении избирательной кампании по выборам депутатов Госсобрания (Ил Тумэн) республики (8 сентября 2013 г.) .
Коллектив редакции поздравляет Полину Михайловну и желает дальнейших творческих успехов.
Соб. инф.