Ыал бастыҥа аатыран
06:12 27.02.2014 16+
Хас биирдии киһи орто дойдуга олох дьолун билээри, кэнчээри ыччатын тэнитээри күн сиригэр төрүүр. Дьылҕа-хаан ыйааҕынан аналын көрсөн, аал уоту оттунан, алаһа дьиэ тэринэн, оҕолонон-урууланан, дьол-соргу аргыстаах олоҕу олорор.
Бүгүн кэпсиэхпин баҕарабын 25 сыл эн-мин дэсиһэн эйэ-дэмнээхтик, иллээх дьиэ кэргэн буолан олорор Елизавета Алексеевна уонна Петр Петрович Поповтар тустарынан. Кинилэр үрүҥ көмүс сыбаайбаларын олунньу 14 күнүгэр – Тапталлаахтар күннэригэр –Тиксии бөһүөлэгэр бэлиэтээтилэр.
Елизавета уонна Петр иккиэн Бороҕон нэһилиэгиттэн төрүттээхтэр, элбэх оҕолоох ыалга төрөөбүттэрэ. Ол да иһин буолуо, оҕо саастарыттан дьонноругар дьиэ ис-тас үлэтигэр мэлдьи көмөлөһө үөрэнэн, олоххо туһалаах идэни баһылыырга дьулуспуттара.
Петр оскуола кэнниттэн армияҕа сулууспалаан, ытык иэһин толорон, төрөөбүт-үөскээбит Намыытыгар төннөн кэлэн, “Бороҕон” совхозка суоппарынан үлэҕэ киирэр. Онтон Лиза оскуоланы бүтэрээт, Дьокуускай куоракка медучилищеҕа үөрэнэн, сиэстэрэ идэтин баһылаан, төрөөбүт бөһүөлэгин балыыһатыгар ананан кэлэр. Кини өр сылларга маҕан халааттаах аанньал буолан, биир дойдулаахтарын эмтээн, сылаас сыһыанынан ыарыһах дьону санааларын көтөҕөн үлэлээбитэ. Хомсомуолка, барыга-бары көхтөөх эдэр кыыһы Бороҕоннооҕу хомсомуол ячейкатын сэкирэтээринэн талбыттара. Нэһилиэккэ буолар араас спортивнай күрэхтэр, куонкурустар, бырааһынньыктар онтон да атын тэрээһиннэр кинилэр көҕүлээһиннэринэн, көмөлөрүнэн ыытыллаллара. Лиза да, Петр да, эдэр дьон быһыытынан, бу маннык тэрээһиннэргэ кытталлара.
Эдэркээн сүрэхтэр харах-харахтарынан сөбүлэспит иэйиилэрин дириҥэтэн, табаһыттар сүлүөттэрин бырааһынньыгар, күнү көрсүү кэмигэр аан бастаан тапталларыгар билиммиттэр.
Ыал буолуу, аймах-хаан быһыытынан үүнэн-сайдан иһии, орто дойдуга кэлбит киһи мүччүрүйбэт сокуонунан, ытык иэһинэн буолар.
Елизавета Алексеевна уонна Петр Петрович түөрт оҕо күн күбэй ийэтэ, тапталлаах амарах аҕата, икки сиэн оҕо иһирэх эбэтэ, сайаҕас эһэтэ буолаллар. Улахан уол Юрий таптыыр төрөппүттэригэр икки минньигэс сиэн бэлэхтээтэ. Кэргэнэ Айталина Муоматтан төрүттээх мааны кийиит, идэтинэн юрист. Юрий аҕатынаан “Сахаэнерго” Булуҥнааҕы филиалыгар үлэлииллэр. Кини производственнай-техническай отдел маастара, үрдүк үөрэхтээх инженер-тутааччы. Иккис уол Петя армия кэнниттэн Тиксиитэҕи училищеҕа үөрэнэн, автомеханик идэтин баһылаабыта. Кини машинист-дизелиһынан аҕатын, убайын кытта үлэлии сылдьар. Улахан кыыс Алексиана Дьокуускай куоракка “Контур” ХЭТ үлэһитэ, экономист идэтигэр кэтэхтэн үөрэнэр, төрдүс куурус устудьуона. Муннуларын бүөтэ – Лизенька – Арктическай гимназия тохсус кылааһын үөрэнээччитэ, уруһуйдуурун сөбүлүүр.
Елизавета Алексеевна билигин улуустааҕы балыыһаҕа ренгент кабинет лаборана.
Хоту тымныы-тыйыс айылҕалаах дойдуга Елизавета ыраах айаҥҥа сылдьар кэргэнигэр Бүөккэҕэ үтүө сүбэһит, доҕор. Кинилэр үксүн бииргэ бураанынан, вездеходунан элбэхтик айаннаабыттара. Ону тэҥэ дьиэ хаһаайката аҕалара сылайан кэллэҕинэ куруук дэлэгэй астаах, итии чэйдээх, сылаас мичээрдээх көрсөр. Оҕолорун ситиһиилэрин, үөрүүлэрин, күннээҕи сонуннарын ирэ-хоро кэпсиир.
Биһиги улууспутугар бу Поповтар дьиэ кэргэттэрин курдук иллээх-эйэлээх, элбэх кэнчээри ыччаттаах олох очурдарын, ыарахаттарын, орто дойду кэрэтин, аламай күн сырдыгын, үөрүүнү-көтүүнү сарын-сарынтан тайансан, сүүс-сүүстэриттэн өйөнсөн, минньигэстик мичээрдэһэн, саха ыалын сиэринэн аал уоту оттунан, алаһа дьиэ тэринэн, тоҥмуту ириэрэн, аччыктаабыты аһатан, кэскили тэниппит ыалларынан ааттыыбын – урукку сылларга кыһыл көмүс сыбаайбаларын бэлиэтээбит Күһүүр нэһилиэгин ытык- мааны ыалларын Зинаида Егоровна, Василий Афанасьевич Стручковтары, Матрена Михайловна, Иннокентий Михайлович Бурцевтары, Ксения Григорьевна, Иван Николаевич Осиповтары, Бороҕон нэһилиэгин истиҥ-иһирэх ыалын Христина Николаевна, Тимофей Иванович Корякиннары, Найба сэлиэнньэтиттэн сайаҕас-амарах ыалы Анна Васильевна Чирикованы уонна Гаврил Константинович Шадрины, Тиксии бөһүөлэгин талба ыалларын Зоя Васильевна, Николай Данилович Семеновтары.
Дьол аргыстаах олохторун – үрүҥ көмүс сыбаайбаларын – бэлиэтээбиттэрэ: Тиксии саргылаах ыаллара Людмила Прокопьевна, Николай Михайлович Поповтар, Ольга Васильевна, Олег Анатольевич Раевскайдар уонна Александра Стальевна, Николай Семенович Васильевтар, Мария Егоровна, Семен Васильевич Слепцовтар.
Бу хоту дойду хоһуун ыалларыгар кэнчээри ыччаккытыгар ахсаабат кыһамньыгыт, уҕараабат тапталгыт, ыллыктаах санааҕыт,сылаас сыһыаҥҥыт хаһан да уосубатын диэн алгыс тыл үтүөтүн аныыбын. Эһиги олоххо муударай сыһыаҥҥыт олохторун устун араҥаччылыы-арчылыы сырыттын. Уйгулаах олоххутугар куруутун дьол-соргу тосхойдун, алаһа дьиэҕитигэр аламаҕай күн өрүү сандаара тыгыахтын.
Наталья СТРУЧКОВА,
улуустааҕы ГТАС салайааччыта,
