18+
Герб
Рекламный баннер 980x90px unterhead
Архив
Рекламный баннер 300x200px left-1
Мы в соцсетях
Рекламный баннер 300x600px left-2
Рекламный баннер 300x60px right-1
Рекламный баннер 300x60px right-2

«Чарчыкы» учаастак балыксыттара

05:53 11.12.2014 16+
2328

Таймылыыр унитарнай хаһаайыстаба сүрүн дьарыга – балыктааһын. Бүгүн уон учаастакка 30  балыксыт үлэлэрин үгэнэ. Алта учаастак Өлөөн өрүскэ, түөрт учаастак Өлөөн боротуокатыгар бааллар. Сыллааҕы былааннара 115 тонна. Сыл бүтүүтэ бултаммыт балык  хомуллан, кыһыҥҥы суолунан Дьокуускай куоракка айанныахтаах.  

                     

Таймылыыртын 50 км ыраах учаастакка Чар­чыкы балык­сытта­рыгар айанныыбыт. Бу учаастак Өлөөн өрүс үр­дүгэр турар. Манна кырдьаҕас балыксыт Степан  Николаевич  Бе­тюнскай икки уолунаан Николай уонна Степан буолан балыктыыллар. Сарсыарда эрдэ, халлаан сырдыыта тиийбиппит да, дьоммут ойбоннорун алларан бүтэрэн эрэл­лэрэ. Бастакы илимҥэ хаптарыллыбыт тыыннах хамсыы сылдьар балыктары хаартыскаҕа түһэрээри илиим тоҥон бүттэ. Балыксыт барахсан   тулуурдаах да киһи буоллаҕа, төһө да анал бэрчээткэлээҕин иһин, тыалга-тымныыга  муустаах ууну кытта мөхсүү судургу буолбатах. 

Степан Николаевич уола  Степан бэрт сымсатык, түргэнник хамсыыр балыгы элээрдэн иһэр. Таҥастара чараас курдук,  хамсана сылдьар дьон тоҥмотторо биллэр. Степан Николаевич этэринэн, икки туонна былааны толоробут диир. Билигин түөрт уон илими көрөллөр, сүүрбэччэ илимнэрин эспиттэр. Туттарбыт балыкпыт харчытын кэлин төлүүллэр, хаһаайыстыба барытын туттаран, аахсан бүттэҕинэ диир.  Кэпсэтэн билбитим,  Степан Николаевич уһун кэмҥэ капитанынан  «Тугут»,  онтон  «Рыбак» диэн Таймылыыр совхоз катердарыгар уста сылдьыбыт. Ол саҕана Өлөөн өрүһүнэн таһаҕас бөҕөнү таспыт. Ол кэмнэргэ арааһа, анал үөрэхтээх капитан улууска элбэҕэ суоҕа буолуо. Степан Николаевич  Дьокуускайдааҕы речной училищаны бүтэрбит. Ол кэмтэн ханна да сир уларыппакка, катерыттан үлэлээн бүтэн, билигин алта уон сааһын томточчу туолан, балыксыттыы сырыттаҕа. Бэрт уһун, сыралаах үлэҕэр туох аат-суол баарый диэн ыйытабын, ону ким билэр, урут грамоталар бааллар ини диир. Мин санаабар, сэмэй, үлэ бөҕөнү  үлэлээн кэлбит дьоммут, хойутаабакка, кэмигэр эрэ чиэс-бочуот ааттарын ылаллара ордук суолталаах буолуо этэ. Онон  тыа хаһаайыстыбатын үлэтин салайан олорор дьоммут, ити боппуруостарга болҕомтолоох буолалларыгар баҕа санаабын этиэм этэ. Бэрт сэргэх кэпсээннэх Степан Николаевичтыын  быраһаайдаһан айаҥҥа турунабыт. Үлэһит дьон үлэлии-хамныы хаалаллар.

Татьяна Слепцова,

Ааптар хаартыскалараа