18+
«Радость» уонна «Ситим» тэрээһиннэрэ
Улуустааҕы кииннэммит библиотека иһинэн инбэлииттэргэ «Радость», ветераннарга «Ситим» клубтар тэриллэннэр араас хайысхалаах тэрээһиннэр тиһигин быспакка буолаллар. Ол курдук, халандаар кыһыл күннэригэр библиотека уруоктарын, тылынан уус-уран сурунааллары, литературнай түмсүүлэри, билиини-көрүүнү сайыннарар викториналары бөһүөлэк ааҕааччыларын араас араҥаларын хабан (оҕотуттан кырдьаҕаһыгар диэри) утумнаахтык үлэлиир.
Алампаҕа анаан
Библиотека үлэһиттэрэ тэрээһиннэри ааҕар саалаҕа эрэ муҥурдаммакка, тэрилтэлэринэн сылдьан эмиэ оҥороллор, кытталлар, дьиэлэринэн кэрийэн кыаммат ааҕааччылары кинигэнэн хааччыйаллар.
Ити чэрчитинэн соторутааҕыта Тиксиитээҕи ойуулуур-дьүһүннүүр Арктика музейыгар саха уһулуччулаах суруйааччыта, театры төрүттээччи, бастакы сахалыы хаһыаттары, сурунаалы тэрийсибит маҥнайгы суруналыыс, тылбаасчыт, критик, бөлүһүөк А.И. Софронов-Алампа Булуҥтан Уус-Өлөөҥҥө айанын 90 сылыгар анаммыт тэрээһин буолла. Онно М.А. Рожина салайааччылаах тыыл, үлэ бэтэрээннэрэ кытыннылар.
Музей дириэктэрэ М.А. Филиппова ыалдьыттары саҥа арыллыбыт хартыына галереятын көрдөрөн үлэлэри сиһилии билиһиннэрэн кэпсээтэ. Ол кэннэ тэрээһин сүрүн чааһа итии үүттээх чэй иһиитинэн саҕаланна. Булун сиригэр сылдьыбыт суруйааччыларыттан биир бастыҥнара Алампаны сэҥээрэн, кини айанын, сылдьыбыт сырыытын чинчийэн үөрэтэ сылдьар, Булун улууһун Бочуоттаах гражданина Т.К. Слепцова, суруйааччы олоро сылдьыбыт сирдэригэр Түмэтигэ, Уус-Өлөөҥҥө сылдьыбытын, дьонтон хомуйбут ахтыыларын туһунан кэпсээтэ, бэйэтэ түһэртээбит хаартыскаларын көрдөрдө. Библиотека үлэһитэ Л.М. Корякина Алампа олоҕуттан фото слайдары көрдөрдө, В.В. Стручкова Алампа Булуҥҥа олорон суруйбут айымньыларын кинигэлэрин ырытан кэпсээтэ, олоҕун туһунан кылгас викторина оҥордо. Мустубут дьон Алампа кэргэнигэр анаабыт “Үрүҥ туллук өрө мөлбөстүүр” ырыатын ыллаатылар. Ити курдук сылдьыбыт дьон саҥаны истэн, сынньанан, астынан тарҕастылар.
Инбэлииттэргэ анаммыт
декаданы саба
Соторутааҕыта библиотека ааҕар саалатыгар инбэлииттэр декадалара буолан ааста. Бастакы күн ЦПИ отдел сэбиэдиссэйэ Айталина Семеновна Иванова «Мин – оҕобун, мин – киһибин, мин – гражданиммын» тиэмэҕэ, Арктическай гимназия уонна бастакы нүөмэрдээх оскуола үөрэнээччилэригэр бэйэ быраабын, эбээһинэһин билии туһунан кэпсээтэ, остуоруйалартан холобурдары туһанан ырытта. Декада иккис күнүгэр үгэскэ кубулуйбут сыл аайы ыытыллар «Поле Чудес» оонньуутугар «Сахабыт сирин устун» тиэмэҕэ оҕолор үөрэ-көтө кытыннылар. Манна инбэлиитэр уопсастыбаларын бэрэссэдээтэлэ Н.И. Апросимова бэйэтэ спонсордаан оҕолор араас бириискэ тиксэн тарҕастылар. Атын күннэргэ салгыы «Былааһы кытта кэпсэтии” – улуус администрациятыгар, шашкаҕа күрэх – ЦСБО дьиэтигэр буолан аастылар.
Декаданы түмүктүүр күн- библиотека ааҕар саалатыгар – улахан дьоҥҥо ананна. Бу дьоро киэһэни сэбиэдиссэй Людмила Михайловна Корякина иилээн-саҕалаан ыытта.
Бырааһынньыктыы сиэдэрэйдик киэркэйбит ааҕар саалаҕа, талым талба астаах остуол тардыллыбыт. Комплектование отделын сэбиэдиссэйэ Елена Николаевна Гоголева мустубут ыалдьыттар нарын-намчы оҥоһуктарын олус тупсаҕайдык наардаан “Волшебных рук прикосновение” диэн быыстапкаҕа уурталаабытын, бары да сөҕө махтайа көрдүбүт. Манна бааллар: оҕуруонан, быысапканан симэхтэр, хартыыналар, таҥас лоскуйдарынан аттарыллыбыт оҥоһуктар, баайыы, тигии бэргэһэлэр, кофталар араастара, саха бастыҥатыттан этэрбэс билэтигэр уонна дьиэҕэ кэтэр тапочкаҕа тиийэ эгэлгэ оҥоһуктар. Оҥоһуктар хаһаайкалара – С.А. Каженкина, И.П. Канина, А.М. Комина С.М. Попова кырдьык да дэгиттэр талааннаах, уран тарбахтаах дьон эбиттэр. Бу дьоро киэһэҕэ, 75 сааһын томточчу туолбут үбүлүөйүнэн «Тиксии бөһүөлэгин Бочуоттаах гражданина” бэлиэни ылбытынан Елизавета Ивановна Никифорованы эҕэрдэлээн, библиотека үлэһиттэрэ сэмэй бэлэх туттардылар.
Ыалдьыттар «Кладовая рукоделия» кинигэ быыстапкатын сэҥээрэ көрдүлэр. Манна иллэҥ кэмҥэ ииһинэн, оҥоһуктарынан дьарыктаныан баҕалаахтарга сүбэлэр-амалар, эскизтэр, выкройкалар бааллара кинилэр болҕомтолорун тартылар.
Үҥкүү, ырыа, оонньуу хамаанданан күрэҕинэн солбулунна. Ветераннар оҕо саастарын санаан хамаандаларын «Октябрята», «Пионеры» диэн ааттаатылар. Араас сорудахтаах биэс түһүмэхтээх күрэҕи библиотека көһө сылдьар отделын сэбиэдиссэйэ В.В. Стручкова тэрийдэ. Дьүүллүүр сүбэ: Н.И. Апросимова, Л.М. Корякина, Е.Н. Гоголева – кыттыбыт ыалдьыттарга номинацияларынан бириистэри туттарда.
Вуталина Стручкова, общкорр.