Депутат Елена Голомарева: "Сиргитин докумуонната охсуҥ"
Ааспыт сылга дьүүллэһиитэ саҕаламмыт Уһук Илин федеральнай уокурукка 1 гектар сири Россия олохтоохторугар босхо түҥэтии туһунан сокуон барыла билигин даҕаны болҕомто киинигэр турар.
Ыам ыйын 1 күнүттэн үлэҕэ киириэхтээх сири босхо түҥэтии федеральнай сокуон тула тэрээһин дьаһаллар билигин да далааһыннаахтык ыытылла тураллар.
Ил Дархан Егор Борисов Госдума бастакы ааҕыытын ааспыт тустаах сокуон олоххо киириитэ хайаан да түһүмэхтэринэн барыахтааҕын туруорсар уларытыыны киллэрэргэ бигэ соруктаах үлэ ыытар. Маны сэргэ хотугу аҕыйах ахсааннаах норуоттар интэриэстэрэ көмүскэллээх буолуохтааҕын, итиэннэ бу сокуон ылыллыытыгар регион санаата эмиэ учуоттанарыгар усулуобуйа тэриллиэхтээҕин туруорар.
Егор Борисов сыл саҕаланыытыгар Уһук Илиҥҥи федеральнай уокурукка сир учаастагын түҥэтии сокуона үлэлииригэр Нам улууһа пилотнай оройуоннартан биирдэстэрэ буоларын иһитиннэрбитэ.
Нам улууһун КУМИ-тын дириэктэрэ Владимир Соловьев иһитиннэрбитинэн, Ил Дархан маннык быһаарыы ыларыгар Нам оройуонун географическай балаһыанньата, территорията дьоҕуһа, инфраструктурата (суола-ииһэ, сибээһэ) үчүгэйэ учуоттанна. “Онон бастакы түһүмэххэ киирсиигэ, ол эбэтэр улуус иһигэр улуус олохтоохторугар сири түҥэтиигэ биһиги күүстээх үлэни ыытан атын улуустарга холобур көрдөрүөхтээхпит”, – диир кини.
Түһүмэхтэринэн ыытыы диэн ол аата сири бастаан улуустарга, онтон Уһук Илин олохтоохторугар, салгыы Россия гражданнарыгар түҥэтиллиэхтээх.
Маннык этиилэри Ил Дархан Егор Борисов Уһук Илиҥҥи федеральнай уокурукка РФ президенин боломуочуйалаах бэрэстэбиитэлэ Юрий Трутнев ыыппыт мунньаҕар эмиэ этиммитэ.
Бу Саха сириттэн киирбит этиилэри Госдума депутаттара 2-3-с ааҕыыларыгар ылыналлара буоллар диэн эрэнэбит.
Билигин даҕаны Ытык кэрэ сирдэрбит, кыра ахсааннаах норуоттар сирдэрэ-уоттара ситэри докумуонунан бигэргэнэ илик. Ол иһин өрөспүүбүлүкэ салалтата 2016 сылтан саҕалаан үп-харчы көрөн, үлэ ыытыллыахтааҕын иһитиннэрдэ.
Оттон Ил Түмэн депутата Елена Голомарёва уопсастыбаннай тэрилтэлэр бэрэстэбиитэллэрин кытта көрсүһүү ыыппыта. Манна хотугу эргимтэ олохтоохторо эмиэ кыттыыны ыллылар.
Бу кэпсэтиигэ сүрүннээн сир учаастагын төһө кыалларынан бэйэ аатыгар докумуонната охсор сорук турара этилиннэ. Ол эбэтэр кадастровай пааспар оҥорторон, сири учуокка туруортарыахтааххыт. Оччотугар ыам ыйын 1 күнүгэр, сокуон үлэтин саҕалыырыгар, сиргит каартаҕа кыһыл өҥүнэн бэлиэтэнэн турар буолар. Ол аата атын туора киһинэн эһиги сиргит тыытыллыбат. Ол сиргэ эн эрэ бырааптааххын.
Билигин судаарыстыбаннай регистрация, кадастр уонна картография федеральнай сулууспата оһуобай статустаах, ол иһигэр хотугу норуоттар түөлбэлээн олорор уонна үгэскэ кубулуйбут хаһаайыстыбаларынан дьарыктанар сирдэрин, учуокка ылан, Росреестрга ыытар.
Елена Голомарева иһитиннэрбитинэн, сир учаастагын докумуоннатыыга республика бюджетыттан үп көрүллүбүт. Бу иннинэ бюджеттан 141 родовой община сиригэр кадастровай пааспар ыларыгар үбүлэммит.
Манна эбии республика таһымнаах 125 ураты харыстанар айылҕалаах территориялары учуокка ылыы барар. Бу сир уопсай иэнэ – 64 мөл.га. Билигин 19 маннык сир учуокка ылыллара хаалбыт.
Оттон муниципальнай таһымнаах 93 ураты харыстанар айылҕалаах сиртэн өссө да 66 сир учуокка ылыллыбакка турар. Дьэ, бу манна олохтоох баһылыктар, депутаттар күүскэ ылсан үлэлиэхтэрин наада.
Полина Николаева