Улуус баһылыгын отчуота түмүктэннэ
Бу күннэргэ улуус баһылыга Күһүүр уонна Сииктээх олохтоохторун иннитигэр 2015 сылга туох үлэтэ барбытын туһунан билиһиннэрдэ, ол гынан улуус нэһилиэктэрин барытын хабан отчетун түмүктээтэ.
Ол курдук олунньу 19 күнүгэр “Чолбондор” сынньалаҥ киинигэр Күһүүр олохтоохторугар отчуот буолан ааста.
К.Н. Шахурдин бу дьыл олунньу 10 күнүгэр “Нижне-Ленскэй” АУо генеральнай директорын И.И. Андреевы кытта 2016 сылга салгыы үлэлэһэллэрин туһунунан сөбүлэһии баттаспытын туһунан кэпсээтэ.
Тыа хаһаайыстыбатыгар киирдэххэ, 2015 сыл саҕаланыыта улууспутугар 13007 таба баар эбит буоллаҕына, билиҥҥи туругунан 11526 таба ааҕыллар, тоҕо маннык буолбут диир буоллахха арааһынай биричиинэтэ элбэх. 2015 сылга уопсайа 41 бөрө, үс эһэ бултаммыт. Кэнники сылларга эһэ элбээбитэ табаһыттары дьиксиннэрэр, кутталы үөскэтэр.
ОДьКХ салаатыгар киирдэххэ, тэрилтэ 2015 сылы үчүгэй хаачыстыбалаахтык, таһаарыылаахтык үлэлээбитин туһунан Константин Николаевич иһитиннэрдэ. 2016 с. Күһүүргэ саҥа котельнай 100% үлэҕэ киирэрэ кэтэһиллэр, онно олохтоохтор өттүлэриттэн эмиэ көмө наада буолара этилиннэ.
Сайыҥҥы өттүгэр Күһүүр, Сииктээх нэһилиэктэрин олохтоохторун саамай сүрүн кыһалҕаларынан теплоход сырыыта буоларын билэбит. Константин Николаевич бу сылга “Механик Кулибин” теплоход сылдьарын уонна сыаната үрдээбэтин туһунан мэктиэлээтэ.
Үөрэх өттүгэр, оҕолорбут ситиһиилэрэ элбэх: үөрэх чааһыгар, спорт көрүҥнэригэр, култуураҕа. Ол курдук Күһүүр орто оскуолата республика үрдүнэн 647 оскуолаттан биир бастыҥ оскуола аатын ылбытын туһунан иһитиннэрдэ. Булуҥ улууһа манан киэҥ туттарын хайҕыы бэлиэтээтэ.
Күһүүр олохтоохторо сүрүн кыһалҕалара:
- Нэһилиэккэ суол-иис суоҕа. Олохтоохтор этэллэринэн, баһаар курдук кутталлаах, ыксаллаах быһыы үөскээтэҕинэ теплотрассалар массыынаҕа мэһэй буолалларын иһитиннэрдилэр.
- Олохтоох оҕолор промышленность өттүгэр көхтөөхтүк баралларын ситиһэр сыалтан Тиксиитээҕи элбэх профиллаах лицейга бу салаа өттүгэр анал группа арыйыахха диэн баҕа санааларын эттилэр.
- Бензин боппуруоһа. Олохтоохтор суруйтарбыт бензиннэрэ хаһан кэлэрэ былааннанарын туһунан туоһуластылар.
- Сайынын уунан сырыы баар эбитбуоллаҕына, кыһыҥҥы өттүгэр суол-иис суох буолан, эминэн хааччыйыы кыһалҕаларын этиннилэр.
- Күһүн аайы улууска кэлэр оҕуруот аһын хаачыстыбата мөлтөҕүн этиннилэр.
- Нэһилиэккэ суол суоҕунан сибээстээн олохтоохтор ыксаллаах быһыыга-майгыга туһалаах вездеход көрүллэрин туруорсар боппуруоһун киллэрдилэр .
Киирбит ыйытыктарга барытыгар хоруй бэрилиннэ.
Улуус баһылыга К.Н. Шахурдин: “Эн-мин дэспэккэ, иллээхтик, бары бииргэ түмсэн үлэлээтэхпитинэ кыахтаах буолуохпут! Улууспут, дойдубут сайдарын туһугар биир буолуохха”, – диэн баҕа санаатын этэн туран отчуоту түмүктээтэ.
Харысхан ПОПОВ
Ааптар хаартыскаҕа түһэриитэ