Оҕолору дойдуларыгар бэриниилээх буоларга үөрэтии
Олунньу 27 күнүгэр биһиги улууспутугар КСК спортивнай саалатыгар Советскай Союз геройа Федор Попов 95 сылыгар анаммыт “Снежный барс” военнай-спортивнай күрэх буолан ааста.
Күрэх сүрүн сыалынан буолар оҕолору патриот уонна дойдуга бэриниилээх буолууга иитии. Улаатан эрэр оҕолор Дойдуларын историяларын, Россия армиятын историятын билиэх тустаахтар.
Күрэххэ Тиксиитээҕи 1,2 нүөмэрдээх орто оскуолалар, Арктикатааҕы гимназия уонна Быыкап орто оскуолата кыттыыны ыллылар. Хас биирдии хамаанда 11 кыттааччыттан (7 уол, 4 кыыс) турда. Сарсыарда өттүгэр хамаандалар стройунан хаамыыга, АК-74 аптамааты ыһыыга, таҥыыга күрэхтэстилэр.
Киэһээҥҥи өттүгэр спортивнай күрэх саҕаланна. Уолаттарга силовой тардыныы уонна турникка истэригэр дылы толору тахсыы көрүҥэ буолла. Бу көрүҥҥэ Арктикатааҕы гимназия үөрэнээччитэ Иванов Руслан бэйэтин кыанарын толору көрдөрдө. Кыргыттарга пресс хачайдааһын ааста. Манна Семивеличенко Татьяна тэҥнээҕин булбата. Үөрэнээччилэр бэлэмнээхтэрин көрдөрдүлэр, ким да туран хаалбата. Бу кэннэ улахан уонна кыра саастаах уолаттарга 1000 м, онтон кыргыттарга 500 м сүүрүү буолла. Манна да оҕолор бэйэлэрин эрэ санаммакка хас биирдиилэрин эккиритиннэрэн хамаанданан үлэлээһини көрдөрдүлэр. Быһый атахтаахтарынан Арктикатааҕы гимназия оҕолоро буоллулар. Бүтэһик түһүмэҕинэн саамай күүрүүлээх, киирсиилээх байыаннай эстафета буолла. Эстафета маннык усулуобуйанан барда – сүүрүү, сыалга граната быраҕан табыы, аптамаатынан туран, олорон, сытан эрэ ытыы, бааһырбыт табаарыһы наһыылканнан көтөҕөн илдьии, дьааһыктаах сэрии сэбин тутан сүүрүү уонна толору байыаннай таҥас кэтэн, аптамааты тутан сүүрүү.
Түмүккэ хамаандалары наҕараадалааһын буолла. Маҥнайгы миэстэни Арктикатааҕы гимназия ылла, иккис – Тиксиитээҕи маҥнайгы оскуола уонна үһүс бочуоттаах миэстэҕэ Быыкаптааҕы орто оскуола тигистэ. Ону таһынан кыайыылаах аатын сүкпүт гимназия хамаандатын физкультуратын учууталыгар О.А. Парамоноваҕа оҕолору үчүгэй таһымнаахтык бэлэмнээбитин иһин грамота туттардылар.
Харысхан ПОПОВ
Ааптар хаартыскалара