Иван Баланов: “Пенсионнай фонд туһунан Булуҥ улууһун үөрэнээччилэригэр сырдатыы үлэтин ыытабын”
Оройуон баһылыга Күһүүр нэһилиэгэр отчуоттуур кэмигэр Пенсионнай фонд салайааччыта И.М. Баланов бириэмэтин аттаран оскуола оҕолорун кытта көрсүстэ. “Все о будущем пенсии для учебы и жизни” диэн сурунаалы үөрэнээччилэргэ түҥэтэн, үлэтин сүрүн чааһын кэпсээтэ. Санатар буоллахха маннык көрсүһүүлэр Тиксии бөһүөлэгин үөрэнээччилэригэр хас сылын аайы ыытыллаллар.
“РФ Пенсионнай фондата сыл аайы “Все о будущем пенсии для учебы и жизни” диэн сурунаал таһаарар. Күһүн балаҕан ыйыгар “День пенсионной грамотности” диэн сэһэргэһиилэри ыытабыт”, – диэн Иван Михайлович кэпсээнин саҕалаата – “Оскуолаларынан сылдьан улаатан эрэр оҕолорго, ол эбэтэр 9-11 кылаас үөрэнээччилэригэр слайд курдук оҥорон чуолаан хайдах Пенсионнай фонд тэриллибитин, ханнык биэнсийэлэр баалларын туһунан кэпсиибит. Үөрэҕи бүтэрэн, үлэһит киһи буолалларыгар бэлэмниибит, пенсионнай өттүгэр туох уларыйыылар, туох сокуоннар баалларын билиһиннэрэбит.
Суолбут-ииспит суох буолан нэһилиэктэринэн сылдьарбытыгар ыарахаттары көрсөбүт. Бу иннинэ Бороҕон нэһилиэгин үөрэнээччилэрин кытта көрсүспүтүм.
Оҕолорго билиҥҥи систиэмэҕэ хайдах биэнсийэҕэ ананан тахсыахтарын сөбүн, хас саастарыттан тахсалларын, индивидуальнай страховой нүөмэр диэн тугун кэпсээтим, Пенсионнай фонд өттүнэн сүрүн билиһиннэриим бу курдук буолар.
Тиксии бөһүөлэгин оскуолаларын оҕолоругар бэсиэдэ ыытан баран, түмүккэ тугу кэпсээбиппинэн тестирование ыытааччыбын. Бу тестированиеҕэ бэрт үчүгэйдик эппиэттээбиттэрэ, үрдүк таһымнаах көрдөрүүлэри биэрбиттэрэ. Ол аата мээнэ салгыҥҥа кэпсээбэт эбиппин дии саныыбын, оҕолор долоҕойдоругар түһэрэллэр, оччоҕо кэпсиирбэр да астык буолар.
Тестированиеҕэ 16 боппуруос киирэр, холобура, гимназияҕа уонна Тиксиитээҕи бастакы нүөмэрдээх оскуолаҕа тестирование ыыппыппыттан, оҕолор 12-13 эппиэттэн түспэтэхтэрэ. Арктическай гимназияттан биир үөрэнээччи манна барытыгар сөптөөх эппиэти биэрбитэ. Кыттыыны ылбыт оҕолорго кыракый сэмэй бэлэхпин туттарааччыбын, ол курдук, үөрэххэ сыһыаннаах малы”.
Харысхан ПОПОВ