2016 сылы кыайыынан саҕалаатылар
Бу 2016 сылы Булуҥ улууһун Тиксии бөһүөлэгин уолаттара тустууну кыайыынан саҕалаатылар. Ол олунньу ый 28 күнүгэр Саха сирин көҥүл тустууга спорт маастардарын бириистэригэр Амма улууһугар 2003-2005 сыллаах төрүөх уолаттарга өрөспүүбүлүкэтээҕи аһаҕас турнир буолан ааспыт.
Манна спорт оскуолатын (ДЮСШ) иитиллээччилэрэ 32, 35 киилэ ыйааһыннаах уолаттарга Альберт Антонов уонна Эмир Дуйшекеев тэҥнээхтэрин булбатылар. Онтон 38 киилэлээх уолаттарга Анемподист Ачикасов бочуоттаах үһүс миэстэҕэ таҕыста. Даҕатан эттэххэ Анемподист Культурнай спортивнай комплекс уонна спортивнай оскуола иитиллээччитинэн буолар.
Кулун тутар 2 күнүгэр Чурапчы улууһун Мындаҕаайытыгар көҥүл тустууга оскуола оҕолоругар өрөспүүбүлүкэтээҕи аһаҕас турнир буолбута. Манна да биһиги уолаттарбыт үчүгэй көрдөрүүлэри көрдөрдүлэр. 35 киилэҕэ Эмир Дуйшекеевпыт 2 миэстэни ылары ситистэ, Антонов Альберт – 32, Егоров Рамиль 24 киилэ ыйааһыннаах уолаттарга иккиэн үһүс миэстэҕэ таҕыстылар.
Кулун тутар 6 күнүгэр көҥүл тустууга хамаанданан көрсүһүү буолла. Амма улууһуттан Эмис, Сатаҕай, Алтан нэһилиэктэрэ, Мэҥэ-Хаҥалас улууһуттан Бүтэйдээх нэһилиэгэ уонна Булуҥ улууһун Тиксии бөһүөлэгин хамаандалара күөн көрүстүлэр. Хамаандаҕа биэстии уол киирэр эбит буоллаҕына, бэйэлэрин ыйааһыннарыгар Альберт Антонов, Эмир Дуйшекеев, Рамиль Егоров уонна Анемподист Ачикасов бастаан, хамаандаларыгар кыайыылаах очукуолары аҕаллылар. Чопчулаан этэр буоллахха Алик Антонов иккитэ киирсибит. Бу көрсүһүүгэ Тиксии уолаттара бастыҥ буолалларын көрдөрдүлэр, дакаастаатылар. Бу кыайыыларынан уолаттар тренердэрин Е.А. Никандровы уонна Булуҥ олохтоохторун үөртүлэр.
Билигин Булуҥнааҕы спорт оскуолатын иитиллээччилэрэ Алдан, Амма, Уус-Маайа тустуук уолаттарын кытта П.П. Пинигин бирииһигэр учебнай-спортивнай сборга сылдьаллар. Уолаттарбытыгар ситиһиилэри, кыайыылары баҕарыаҕын.
Маннык кыайыылар улууспутугар спорт сайдан иһэрин көрдөрөллөр.
Харысхан ПОПОВ
Хаартыска Е.А. Никандров архыыбыттан
ылылынна