Таймылыыр үөрэнээччилэригэр психологическэй көмө оҥоһулунна
Олунньу 26-29 күннэригэр Таймылыыр нэһилиэгэр сокуоннай саастарын ситэ илик оҕолорго уонна социальнай көмөҕө наадыйар ыалларга анаан Булуҥнааҕы дьиэ кэргэҥҥэ уонна оҕоҕо көмөлөһүү киинин психолога М.Н. Винокурова психологическэй көмө үлэтин ыытан кэллэ.
Бу тэрээһин чэрчитинэн Мария Винокурова араас психологическэй өҥөнү оҥордо, ол курдук Таймылыыр орто оскуолатын үөрэнээччилэрин кытта ирэ-хоро биирдиилээн кэпсэттэ. Ону таһынан төрөппүттэргэ мунньах ыытта, Булуҥнааҕы дьиэ кэргэҥҥэ уонна оҕоҕо көмөлөһүү киинин үлэтин туһунан уонна туох үлэ бара турарын сырдатта.
Эдэр учууталлары кытта көрсөн идэлэрин төһө сөпкө талбыттарын, үлэлэлэрин хайдах саҕалаабыттарын туһунан сэһэргэстэ уонна 9-11 кылаас үөрэнээччилэрин кытта биирдиилээн кэпсэттэ.
“Оскуола үрдүнэн 7 кылаас үөрэнээччилэрэ кылааһынан наһаа эйэлээхтэрэ, ыга түмсүүлээхтэрэ, арахсааһын, туоратааһын диэни билбэттэрэ киһини үөрдэр. Бу кэннэ социальнай көмөҕө наадыйар элбэх оҕолоох 6 ыалы көрдүбүт-иһиттибит, туох көмөҕө наадыйалларын сурастыбыт уонна кинилэр кыһалҕаларын чэпчэтэр, аччатар туһугар үлэлэһэ сылдьабыт. Биир тылынан эттэххэ, үлэ бара турар” – диэн Мария Николаевна түмүктээтэ.
Харысхан ПОПОВ,
Мария Винокурова хаартыската