Оҕустар забастовкалара
Муус устар 2 күнүгэр «Айхал» этнокультурнай кииҥҥэ Күһүүр народнай театрын артыыстара «Оҕустар забастовкалара» диэн испиктээкил-комедия көрдөрдүлэр.
Күһүүр народнай театра 1970 сыллаахха Саха Республикатын култууратын үтүөлээх үлэһитэ Е.Н. Корякина көҕүлээһининэн тэриллибитэ. Ол күнтэн ыла театр сыанатыттан нуучча, саха суруйааччыларын айымньыларынан араас испиктээкиллэр дьон биһирэбиллэрин ылыахтарын ылбыттара.
Театр бүгүҥҥү артыыстарынан СӨ култууратын туйгуна Г. Кандинскай, СӨ норуотун айымньытыгар үтүөлэрин иһин бэлиэ хаһаайына Н. Шадрин, А. Наумова, М. Николаева, Л. Горнакова, Н. Лебедева, П. Корякин, В. Жирков, А. Винокуров, И. Аммосов, М. Бочарова, Т. Корякина, А. Никитинауонна да атыттар буолаллар. Бу эйгэ үлэһиттэрэ бука бары дьон-сэргэ сынньалаҥын тэрийиигэ, кинилэр духуобунай өттүнэн сайдалларыгар үлэлииллэр-хамсыыллар.
Тиксии олохтоохтоохторугар уонна ыалдьыттарыгар Дмитрий Наумов икки оонньуулаах, сэттэ хартыыналаах «Оҕустар забастовкалара» комедия-испиктээкили көрдөрдүлэр. Оруолларга онньоотулар: Саха Өрөспүүбүлүкэтин култууратын туйгуна Григорий Кандинскай (Тэриэс оҕонньор, дэриэбинэ кырдьаҕаһа, дьээбэлээх-хооболоох киһи), Анастасия Наумова (Оҕустаах Дууньа, саас ортолоох, уруккута сопхуос зоотехнига, дьон туһугар кыһаллар өйдөөх санаалаах дьахтар), Мария Николаева (Матайар Мааса – уҥаны хаҥас, хараны үрүҥ диэбит хотун), Саха Өрөспүүбүлүкэтин норуотун айымньытыгар үтүөлэрин иһин бэлиэ хаһаайына Николай Шадрин (Кулун Уйбаан, өрүү кур холуочук табаарыс), Виталий Жирков (саҥа талыллыбыт нэһилиэк баһылыга, уруккута физкультура учуутала), Павел Корякин (зоотехник, улуус тыатын хаһаайыстыбатын управлениетын специалиһа), Наталья Лебедева (Кэтириинэ, дэриэбинэ дьахтара), Людмила Горнакова (Өкүлүүнэ, дэриэбинэ дьахтара).
Испиктээкили режиссер Саха Өрөспүүбүлүкэтин култууратын туйгуна Р.Н. Бетюнская туруорда. Художник – Лилия Семенова.
Биллэрин курдук, театр үлэтэ сыананы киэргэтииттэн саҕаланан, оруоллары толорууга тиийэ ымпыга-чымпыга элбэх. Дьэ ону табан наардаатахтарына эрэ, көрөөччү дуоһуйууну ылар. Бу киэһэ испиктээкили көрө мустубут дьоҥҥо театр артыыстара бука барыларыгар дуоһуйууну, көрү-көҕү уонна сынньалаҥы бэлэхтээтилэр. Түмүктээн эттэххэ, театр ситиһиитэ – коллектив бүттүүнүн үлэтин түмүгэ.
Ульяна ПОПОВА
Фото автора