Спорду өрө тутан
Булуҥ улууһугар араас спорт көрүҥнэригэр элбэх кыахтаах, күүстээх уолаттардаахпыт. Бүгүн мин кэпсэтэр киһим ХИФУ мас тардыһыы салаатын устудьуона, бэрт сэмэй, бэйэбит уолбут Иван Болтунов:
– Булуҥ улууһун Хара-Уулаах нэһилиэгиттэн сылдьабын. Оскуолаҕа үөрэнэ сылдьан “Дети Севера” кыттар этибит. 2012-2013 сыллардаахха нэһилиэгим оскуолатыттан киирэн 55 кг улууспутугар ыытыллар “Өбүгэлэр оонньууларыгар” иккитэ бастаабытым. Аан маҥнай утаа хапсаҕайынан дьарыктана сылдьыбытым, улууспар 2012 сыллаахха бастаабытым, онтон боруобаҕа диэн мас тардыһыытыгар күрэхтэһэ барса сылдьыбытым, бастакы холонуубар хотторууну билэн, кыһыйан, өссө дьаныардаахтык ылсан туран дьарыктанан, иккис миэстэҕэ тахсыбытым. Урут Быыкап нэһилиэгэр улуус оҕолоругар сылын аайы мас тардыһыытыгар күрэх ыытыллааччы, онно иккитэ иккис миэстэ буолбутум. Мас тардыһыытынан 2011 сыллаахтан дьарыктаммытым. 2013 сыллаахха Хотугулуу-Илиҥҥи федеральнай университет, физкультурнай институт Национальнай көрүҥ бөлөҕөр киирбитим. Онно дьэ үчүгэй дьарыгы саҕалаабытым. Бу спорт көрүҥэр сыһыарбыт, угуйбут киһибинэн буолар оччолорго Хара-Уулаахха үлэлии сылдьыбыт физкультура учуутала Алексей Викторович Егоров. Онтон ХИФУга 1-2 кууруска үөрэнэр кэммэр – Александр Александрович Захаров эрчийбитэ. Бастакы кууруска киирэн бараммын 62 кг ыйааһынтан саҕалаабытым, билигин 70 кг киирсэбин. Билигин 3 куурустан Михаил Ильич Борохин дьарыктыыр.
2014 сыллаахха Уһук Илин чемпионатыгар Хабаровскайга 62 кг ыйааһыннаахтарга 2 миэстэни ылары ситиспитим. Бу күрэххэ үксэ сахалар этилэр, манна саамай ыарахан киирсиибинэн Амма уолун кытта тутуһуум буолар. 2015 сыл сайыныгар Саха сириттэн Благовещенскайга чемпионат России путевка иһин киирсиигэ үс буолан бара сылдьыбыппыт. Бу күрэххэ икки ыйааһыҥҥа киирсибитим, 70 кг бастаабытым, 80 кг иккис буолбутум. Хомойуох иhин, Россия чемпионатыгар эчэйии ылан барбатаҕым. Ол кэмҥэ Горнай улууhун ыhыаҕар мас тардыһыытыгар 70 кг дылы уонна хапсаҕайга абсолютнай чемпион буолбутум. Бу сыл кулун тутар ыйыгар Ньурбаҕа “Кэрэ киһи уола Күүстээх Софрон” бирииһигэр Өрөспүүбүлүкэтээҕи күрэххэ кыттан кэлбитим. Манна 1995-1998 сыллаах төрүөх уолаттарга уонна улахан дьоҥҥо 70кг ыйааһыҥҥа ыарахан киирсиилэр кэннилэриттэн иккиэннэригэр бастаабы-тым уонна МР-155 саанан наҕараадалламмытым. Өссө 70 киилэлээхтэргэ диэри диэн абсолютнайга киирсибитим. Ол абсолютнайга киирсэн дизельнэй станция ылбытым. Күрэхтэһэрбэр Булуҥ улууһун аатыттан, ардыгар үөрэҕим аатыттан киирсэбин, син биир ханнык спорт комплекстан, үөрэхтэн сылдьаргын ааттыыллар. Үксүн Булуҥ улууһун аатыттан киирсэ сылдьабын. Бары күрэхтэһиилэрбиттэн Ньурбаҕа ыытыллыбыт күрэхтэһии саамай сатаммыт, табыллыбыт өйбөр умнуллубаттыы хаалбыт. Миигин манна үөрэппит тренердэрбэр улаханнык махтанабын, манан олорон хаалбаппын өссө да инникитин киирсиэм.
Уолбутугар Иваҥҥа өссө да үрдүк ситиһиилэри баҕарыаҕын. Булуҥ улууһун, Сахатын сирин өссө да ааттата сырыттын.
Харысхан ПОПОВ
Иван Болтунов хаартыската