Таба – хотугу норуот таҥарата
Боломуочуйалаах Константин Роббек миэстэтигэр
балаһыанньаны билистэ
Муус устар 5 күнүттэн 6 сарсыардата буолар түүнүгэр Булуҥ улууһугар Табаһыт сүлүөтүгэр кыттыыны ылбыт Күһүүр сүүрүк табаларын сэймэктээн өлөрбүттэрэ өрөспүүбүлүкэ олохтоохторун барыларын аймаата. Бу күннэргэ Саха Өрөспүүбүлүкэтин Аҕыйах ахсааннаах норуоттарын бырааптарыгар боломуочунайа Константин Роббек кэлэ сырытта. Кини олохтоохтору, борокуратуура, полиция үлэһиттэрин кытта көрсөн ханнык быһаарыылар баалларын билистэ. "Уопсай санаабын өрөспүүбүлүкэ бырабыыталыстыбатыгар тириэрдиэм", – диэтэ кини.
Олохтоох аҕыйах ахсааннаах норуоттар бэрэстэбиитэллэрэ чахчы айманыахтарын айманаллар. Киһи төбөтүгэр сатаан батан киирбэт иэдээн. Ийэлэрин эмиийин үүтүн эмсэхтээн улаатыахтарыттан ыла, табаны таҥараҕа бэлэҕин курдук көрөн үөскээбит дьон ытастаҕа...
Быһылаан тула араас кэпсээн баар. Бастаан утаа таба сүүрдүүтүгэр “хотторбуттар дьыалаларын” курдук кэпсээн тарҕаммыта. Ол эрээри итини ким да итэҕэйиэн баҕарбат! Аны табалары өлөрбүт буулдьаларынан сылыктаан, “байыаннайдар” кыттыһыылаахтар дуу диэн эмиэ этии баар. Онон силиэстийэ чуолкай быһаарыытын кэтэһэбит.
Ил Түмэн депутаттара буруйдаах булуллан
сокуоҥҥа эппиэттииригэр модьуйаллар
Дьокуускай куоракка Ил Түмэн депутаттара Александр Уаров, Елена Голомарева, Иван Андреев, Владимир Членов, Александр Слепцов Арктика дьыалаларыгар судаарыстыбаннай кэмитиэт бэрэссэдээтэлэ Алексей Киселев кыттыылаах мунньах тэрийэн ыыттылар. Парламент вице-спикерэ Виктор Губарев бэрэссэдээтэллээтэ. “Бу дьыаланан анал хамыыһыйа тэриллэн үлэлээн эрэр. Биһиги улуус дьаһалтатыгар ыйытыыбытыгар араас сабаҕалааһын баар диэн эппиэттээтилэр, ол иһигэр байыаннайдар буолуохтарын сөп диэн эмиэ баарын иһитиннэрдилэр. Олохтоох салалта биһигиттэн, норуот депутаттарыттан, буруйдаахтары булан холуобунай эппиэккэ тардарбытыгар көрдөһөр”, – диэтэ кини.
Табаһыт сүлүөтүгэр кыттыыны ылбыт депутат Иван Андреев тэрээһин үрдүк таһымҥа ааспытын, ити кэмҥэ арыгы атыылааһына үс күн тохтотуллан турбутун иһитиннэрдэ. “Табалары анаан өлөртөөбүт курдуктар. Кыыл табаттан дьиэ табатын хайдах да араарбат буолуохха сатаммат, буолаары буолан Тиксии таһыгар кыыл таба хаһан да чугаһаабатын киһи барыта билэр. Быһылаан тахсыбыт сиригэр булуллубут гильза байыаннайдарга сыһыаннаах дуу, сыһыана суох дуу диэнинэн РФ Оборонаҕа министиэристибэтигэр ыйытыы оҥоруохха диэн этиилээхпин”, – диэтэ депутат.
Хамыыһыйа салгыы хайдах быһыылаах үлэни ыытарын, ол иһигэр космическай съемканы көрүүгэ тиийэ, сүбэлэстилэр. Итиэннэ быһа барыллаан муус устар 27-28 күннэригэр Булуҥ улууһугар тиийэн холуобунай дьыаланы билсэри наадалааҕынан аахтылар.
Дьиэ табаларын өлөрүүнэн муус устар 8 күнүгэр ХК 1 чааһын 167 ыстатыйатынан (соруйан суох оҥоруу эбэтэр баайы-дуолу буортулааһын) холуобунай дьыала көбүтүлүннэ. Билигин силиэстийэлиир бөлөх үлэлиир.
Полина НИКОЛАЕВА
Ааптар хаартыскалара
Константин Роббек: Дьыала таах хаалыа суохтаах, быһылаан буруйдаахтара хайаан да накаастаныахтаахтар
Муус устар ыйга табалары ытыалааһын түбэлтэтэ барыбытын аймаабыта. Бу күннэргэ Саха Өрөспүүбүлүкэтин Аҕыйах ахсааннаах норуоттарын бырааптарыгар боломуочунайа К.В. Роббек Тиксиигэ кэлэ сылдьан дьыала хаамыытын кытта сиһилии билистэ. Ол туһунан Константин Васильевич «АМ» корреспонденыгар кылгастык кэпсээтэ:
– Булуҥ улууһугар, хомойуох иһин, табалары ытыалаабыттарын туһунан куһаҕан сураҕы истэммин кэллим. Ол туһунан миэхэ төлөпүөн нөҥүө иһитиннэрбиттэрэ. Тутатына улуус баһылыгын Константин Шахурдины кытары быһылааны чопчуласпытым уонна “Булунское” МУТ аатыттан сурукта миэхэ ыытыҥ диэн көрдөспүтүм. Сонно тэрилтэ салайааччыта Баишева Елена Матвеевна сурук ыыппыта.
Улахан уопсастыбаннай резонанстаммытынан, араас сабаҕалааһын баарынан сибээстээн Ис дьыала миниистиригэр В.Н. Прокопенкоҕа тус хонтуруолга ыларыгар уонна маассабай информация сириэстибэлэрин (МИС) нөҥүө тахсан туох үлэтэ бу дьыаланан бара турарын сырдатарыгар көрдөспүтүм.
Кэлээт, улуустааҕы аҕыйах ахсааннаах норуоттар бэрэстэбиитэллэрин кытта көрсүбүтүм, санаалара түһэ сылдьар. Кинилэр баҕалара диэн ытыалаабыт дьону булан сокуон быһыытынан эппиэккэ тардыы. Табаһыттар, улуус, өрөспүүбүлүкэ олохтоохторо силиэстийэ түмүктэнэрин күүтэллэр, буруйдаахтар көстүөхтэрэ уонна сокуонунан эппиэттиэхтэрэ диэн бигэ эрэллээхтэр. Маннык сидьиҥ быһыы эппиэтэ суох мээнэ хаалбат эбит диэн дьон итэҕэйиэхтээх.
Бэйэм кэлэн силиэстийэ хаамыытын билистим, борокуруору, полиция начальнигын, элбэх дьону кытта кэпсэттим.
Борокуруор кэпсииринэн, билигин матырыйааллары барытын хомуйан экспертизаҕа ыыппыттар. "Үөһэттэн материал кэлэ илигинэ быһааран кэбиһэр кыахпыт суох, силиэстийэ хаммыытын туһунан биллэриэхпит", – диэн кини эрэннэрдэ.
Полиция начальнига Павел Собянин иһитиннэрбитинэн, кэлэр нэдиэлэ саҕаланыытыгар Ис дьыала мнистиэристибэтиттэн икки исписэлиис кэлэрин күүтэллэр, быһылаан буолбут сиригэр эбии дакаастабыл көрдүүллэрэ былааннанар.
Дьыала Арктикатааҕы следственнэй отделыгар бэриллибит. Бу отдел кыра дьыалалары ылбатынан биллэр, ураты ыарахан буруйдары көрөр.
Манна борокуратуура, полиция үлэһиттэрин кытта көрсүһүүлэрим түмүгүнэн уопсай санаабын Саха Өрөспүүбүлүкэтин бырабыыталыстыбатыгар тиэрдиэм.
Ыарахан быһылаан буолбут. Быһата, маннык дьыала таах хаалыа суохтааҕа өйдөнөр, быһылаан буруйдаахтара хайаан да накаастаныахтаахтар. Ол туһугар былаас уорганнара бары үлэлии сылдьаллар.
Харысхан ПОПОВ
Ааптар хаартыскаҕа түһэриитэ