Улуу тренер Бороҕоҥҥо олоро сылдьыбыт сыллара
Аар-саарга аатырбыт улуу тренер, уһулуччулаах педагог Дмитрий Петрович Коркин Чурапчы улууһуттан төрүттээх, үс оҕолоох Мария Андреевна уонна Петр Кириллович диэн ыаллар улахан уоллара этэ.
Оҕолор сотору тулаайах хаалбыттара: Дима, Анна уонна Коля. Кинилэри аан дойдуну атыйахтаах уу курдук аймаабыт сэрии үс аҥы араартаабыта. Коляны абаҕата Бүөтүр Коркин иитэ ылбыта, Анна Татьяна Петровна уонна Роман Иванович Барашковтарга оҕо буола барбыта, онтон Дима Лазаревтарга хаалбыта.
1941 сыллаахха, көһөрүү кэмин саҕана Лазаревтар, Абрамовтар Чурапчыттан көспүттэрэ. Кэрискэҕэ оройуон кииниттэн, Күһүүртэн 45 көстөөх сиргэ тиийбиттэрэ. Кэрискэҕэ икки эрэ кылаастаах оскуола баар эбит. Ол иһин эһиилигэр сэттэ көстөөх сиргэ Бороҕоҥҥо интернакка олорон үөрэммитэ.
Кини уонтан тахса саастааҕар, Капиталина Николаевна Бурцева, үлэ-тыыл бэтэрээнэ, биэстээх-алталаах саҥа улаатан эрэр кыыс оҕо эбит. Кини маннык ахтар:
«Сэрии, көһүү саҕана Лазаревтар «Сырдатыы» диэн колхозка Кэрискэҕэ кэлбиттэрэ. Эдьиийигэр Балааҕыйаҕа, күтүөмэтигэр Мэхээлэлээххэ иитиллибитэ. Ол саҕана Балааҕыйа ыанньыксытынан үлэлээбитэ, онтон Мэхээлэ колхоз суотчута этэ. Эбэлэрэ Евдокия Тихоновна Абрамова оскуолаҕа остуорастаабыта. Онтон билиҥҥиннэн эттэххэ Бороҕон Томтордооҕу оскуолатыгар Роман Романабыстыын үөрэммиттэрэ. Кинилэр иккиэн Томтор оскуолатын выпусниктара.
Кыра сылдьан куруук Миитэрэйи барыар диэри батыһа сылдьааччым, онньооччум, хайа баҕар түбэлтэҕэ Миитэрэй барахсан кыыһырар диэни билбэт этэ. Өйдөөн көрөрбөр чэйгэ биир кырбас сиикэй эти сиэччилэр. Лазаревтар миигин кытта саастыы Еля диэн кыыстаах этилэр, кинини кытта наар оонньоон, сааратан тахсааччым. Еля оҕо сылдьан өлбүтэ, билигин Кэрискэҕэ көмүллэ сытар.
Сэрии бүппүтүн кэннэ Миитэрэйдээх табанан барбыттара, быраһаайдаһалларыгар саанан дэлби ытыалаабыттара, ол саҕана салют курдук буолааччы. Мин барахсан сайыһаммын хараҕым уута икки хара тыаннан этэ.
«Ол кыыс оҕолорун буллаххытына үөрэттэрээриҥ», – Миитэрэй иннэ диирэ үһү. Онтон ыалдьан баран: «Ол кыыһы булан аҕалыҥ, көрүөм этэ», – диэхтээбит үһү».
Бурцева Капиталина түөрт оҕото төрдүөн Дуня, Коля, Октя, Ганя Д.П. Коркиҥҥа үөрэммиттэрэ. Бу мантан Бороҕонтон үөрэнээччилэри дьарыктаары элбэх оҕолору илдьэ барбыттара.
Бороҕон орто оскуолата билигин Томторго турбат, 1974 сыллахха атын оскуоланы туппуттара. Ол оннугар Томторго сылын аайы сылдьабыт, бу мантан чугас аҕыйах мүнүүтэнэн хааман тиийиэххэ сөп. Билигин Д.П. Коркин үөрэммит оскуолата Томторго өтөҕө эрэ турар, ол да буоллар кырдьаҕастар кэпсээннэриттэн истэн билээччибит. Биһиги Бороҕон орто оскуолатын үөрэнээччилэрэ кини бу манна, сирбитигэр кэлэн олохсуйан, дьоммутун кытта алтыһан-доҕордоһон, оскуолабытын бүтэрэн, кылгастык эттэххэ, биһиги сирбитигэр улуу тренер олорбута диэн наһаа да астынабыт. Сахалартан бастакы ССРС, РСФСР, Саха АССР үтүөлээх тренера Д.П. Коркины маннааҕы Намыы учууталлара, баспытааталлара, олохтоохторо билэллэрин, көрбүттэрин, үөрэппиттэрин инник улуу тренеры олоххо туруорбуттарынан олуһун да киэн туттабыт.
Варя Бурцева, Бороҕон орто оскуолатын
9 кыл. үөрэнээччитэ (оскуола «Переменка» хаһыатын редактора)