Киһи төрөөбүт сирин, дойдутун билиэхтээх
Бу күннэргэ Дойду үрдүнэн Полярник күнэ буолан ааста, манан сибээстээн улуустааҕы библиотека ааҕар саалатыгар оскуола оҕолоругар, инбэлиит дьоҥҥо уонна үлэ бэтэрээннэригэр анаан “Поле чудес” оонньуу, викторина күрэхтэрэ ыытылыннылар. Арктика туһунан үөрэнээччилэр төһө билэллэрин сиһилии библиотека үлэһитэ Вуталина Стручкова кэпсиэҕэ:
– Ааҕар саалабытыгар ыам ыйын 25 күнүгэр полярник күнүгэр аналлаах үөрэнээччилэргэ, инбэлиит бэтэрээннэргэ тэрээһин буолан ааста. Күн бастакы аҥарыгар Тиксиитээҕи профессиональнай лицей оҕолоро, Тиксиитээҕи маҥнайгы №-дээх оскуола, Арктикатааҕы гимназия 10 кылааһын үөрэнээччилэрэ кэлэн көхтөөх кыттыыны ылан, сэргэхсийэн, элбэҕи билэн-көрөн барбыттара. Надежда Апросимова оҕолорго Арктика сирин-уотун туһунан компьютерга слайда көрдөрбүтэ уонна кэпсээбитэ. Мин Полярник күнэ хаһан тэриллибитин, туох суолталааҕын, манна ким улахан оруолу оонньообутун туһунан сэһэргээбитим. Үөрэнээччилэр Арктика туһунан өссө дириҥник билэллэрин туһугар онно сөп түбэһэр кинигэлэри сүбэлээбитим. Бу кэннэ үс түһүмэхтээх “Поле чудес” оонньоппуппут. Манна оҕолор наһаа көхтөөхтүк оонньообуттара. Оонньуу кыайыылааҕынан Тиксиитээҕи маҥнайгы №-дээх оскуола үөрэнээччитэ Тихонов Алеша ааттаммыта уонна флешканы бэлэх туппута.
Киэһээҥҥи өттүгэр инбэлиит уонна кырдьаҕас дьоммутугар интеллектуальнай оонньуу тэрийбиппит. Тэрээһиҥҥэ ыҥырыылаах дьоммут үксүлэрэ балыыһаҕа киирэн, аҕыйах киһи кэлбитэ. Ыалдьыттарбытыгар бырааһынньык туох суолталааҕын Надежда Ивановналыын билиһиннэрбиппит.
Түмүккэ оҕолор ситэри бэйэлэрин дойдуларын билэллэригэр, Арктика туһунан үөрэнээччилэргэ өссө дириҥэтэн, үчүгэйдик сырдатар үлэ ыытыахха наада эбит диэн этиэхпин баҕарабын.
Харысхан ПОПОВ
Надежда Апросимова хаартыскаҕа түһэриитэ