Эдэр ыал нэһилиэк инники кэскилэ
Нэһилиэкпит саамай көхтөөх эдэр ыалларыттан биирдэстэринэн буолаллар Дьяконовтар дьиэ-кэргэннэрэ. Эдэр дьон 2014 сыллаахха ыал аатын сүгэн, алаһа дьиэ-уот тэринэн Хара-Уулаах нэһилиэгэр олороллор.
Уйгулаана Хара-Уулаах нэһилиэгиттэн төрүттээх. Оскуоланы бүтэрэн, Дьокуускайдааҕы медицинскэй колледж медсестра салаатын ситиһиилээхтик бүтэрэн, баһыйбыт идэтинэн төрөөбүт дойдутугар кэлэн, күн бүгүнүгэр диэри үлэлии сылдьар.
Эдэр дьиэ аҕата Бүлүү улууһуттан төрүттээх. Маһынан уустанарын, саха эр киһитигэр хаанынан бэриллибит дьарыгынан – бултуурун сөбүлүүр. Олох-дьаһах коммунальнай хаһаайыстыба Булуҥнааҕы филиалын тэрилтэтигэр операторынан үлэлиир.
Эдэр ыал номнуо икки оҕо төрөтөн, амарах аҕа, иһирэх ийэ аатын сүгэн олороллор. Кинилэр нэһилиэк, улуус күрэҕэр олус диэн көхтөөхтүк кытталлар. Ол курдук, дьиэ хаһаайката нэһилиэк күрэҕэр «Бастыҥ Ийэ-2015» аатын сүгэн, олохтоох дьон биһирэмин ылбыта. Кэргэнэ Олег улуус, нэһилиэк эдэр ыччат түмсүүтүгэр култуурнай, спортивнай күрэхтэргэ көхтөөхтүк кыттан, сахалыы остуол оонньууларыгар бастыҥ кыттааччы аатын сүкпүтэ.
Эдэр ыал нэһилиэк инники кэскилинэн буолар. Ону өйөөн, күүс-көмө буолан, сирдэтэн-салайан биэрэн, өйөбүл буолуохха наада. Баҕарыаҕын олохторугар ситиһиини, уһун дьоллоох олоҕу, өйдөһүүнү-өйөһүүнү, сырдык-чөл олоххо тардыһыыны.
Хара-Уулаах нэһилиэгин
дьахталларын түмсүүтэ