Удьуор утум салҕанар

Никититтэр Ольга Гаврильевна, Иннокентий Гаврильевич дьиэ-кэргэннэрэ нэһилиэкпит киэҥ туттар ыалларыттан биирдэстэринэн буолаллар. Ольга, Иннокентий 1999 сыллаахха сүрэхтэрин холбоон ыал буолбуттара, тапталларын туоһутунан буолаллар кыталык кыыстара Марфа, аҕатын туйаҕын хатарар хорсун хоодуот уоллара Кеша. Иннокентий Гаврильевич Хара-Уулаах бөһүөлэгин аатырбыт табаһыт Никитиннэр удьуордарыттан төрүттээх буолан, удьуор ситимин быспакка табаһыт, булчут, «Приморскай» МУТ 1 №-дээх ыстаада биригэдьииринэн буолар. «Бастыҥ табаһыт» диэн Саха Өрөспүүбүлүкэтин наҕараадатын хаһаайына. 

Ольга Гаврильевна оҕо эрдэҕиттэн иистэнэр дьоҕурдаах буолан, үлэтин «Приморскай» сопхуос мехцеҕыгар иистэнньэгинэн саҕалаабыта. Бу күҥҥэ диэри ыстаадаҕа чуум үлэһитинэн үлэлиир. Эбээн төрүт норуоппут сүрүн дьарыгын – таба иитиитин сайыннаран, улуус, өрөспүүбүлүкэ таһымыгар ыытыллар куонкурустарга көхтөөхтүк кыттан, дьон биһирэмин ылыаҕын ылбыта. Дьиэ хаһаайката таба тириититтэн, сарыыттан, кэргэнэ бултаабыт күндү түүлээҕиттэн иистэнэн, оҕуруонан тиспит оҥоһуктара улууска, өрөспүүбүлүкэҕэ, Россияҕа тиийэ иистэнньэҥнэр быыстапкаларыгар кыттан турар. Өрөспүүбүлүкэ таһымнаах «Бастыҥ иистэнньэҥ» быыстапкаҕа кыттан сертификат хаһаайкатынан ааттаммыта, ону таһынан быйыл улуустааҕы табаһыттар сүлүөттэригэр «Бастыҥ чуум үлэһитэ» диэн ааты сүкпүтэ. Никититтэр 2005 сылтан саҕалаан оҕолорун кытта сылын аайы ыстаадаҕа тахсан үлэлииллэр. Ону туоһулуур 2014 сыллаахха ылбыт Саха Өрөспүүбүлүкэтин Президенин Гран-при «Кочевая семья династии Никитиных» сертификата.

Хара-Уулаах нэһилиэгин
дьахталларын түмсүүтэ