Бороҕоҥҥо тунал ыһыаҕы уруйдаатылар
Ыһыах урут-уруккуттан сайыны көрсөр, сири-уоту аһатар сүдү күүстээх бырааһынньык. Бу кэмҥэ Ийэ сирбит күөҕүнэн чэчирээн, сибиэһэй салгынынан чэлгийэр, тыынар. Булуҥ улууһун Бороҕон нэһилиэгин олохтоохторо ыһыах иннинэ улахан субуотунньук оҥордулар. Манна түөлбэлэр, кулууб үлэһиттэрэ уонна эдэр ыччат көхтөөхтүк кытыннылар.
Бэс ыйын 26 күнүгэр ыһыах саҕаланыыта дьон сүөгэйдээх алаадьы амсайан, түптэҕэ ыраастанан, чуораан, хомус тыаһын доҕуһуолугар киирэр аарканы аастылар. Кыттааччылар сахалыы алгыс ырыатынан сири алҕаатылар, алгысчыт киирэн уоту аһатта. Олохтоох дьаһалта баһылыга чороонноох кымыһынан айах тутта уонна бар дьонугар гитаранан сахалыы ырыаны бэлэхтээтэ.
Концерт кэнниттэн мустубут дьон бары «Якутяночка» ырыатыгнан (флеш-моп) уопсай үҥкүүлээтилэр. Түөлбэнэн чороонноох кымыс, чаппараах оҥоһук, сахалыы авангарднай муода, аһастар күрэхтэрэ буолла. Биэс түөлбэ киирсэн бастакы бочуоттаах миэстэни «Дьүкээбил» (салайааччы Аргунова С.В.), иккис миэстэҕэ «Омолой» түөлбэ (салайааччы Иванова М.Е.), үһүс миэстэҕэ «Кустук» (салайааччы Находкина Р.В.) тиксэннэр сыаналаах бириистэринэн наҕараадаланнылар.
«Сахалыы таҥас мааныта» күрэххэ оҕолорого Зарина Горохова онтон улахан дьоҥҥо Варвара Старостина бастакы миэстэҕэ тиксэн үөрүүлэрэ үксээтэ; «Уһун суһуохха» оҕолорго Карина Сивцева, улахан дьоҥҥо Анна Винокурова кыайдылар; «Оһуордаах оһуохай» күрэххэ кэрэ кылыһахтаах куолаһынан Нюргуйаана Сыромятникова ааттанна; фольклорга бастакы миэстэҕэ «Саһарҕа» фольклорнай түмсүү таҕыста (салайааччы Старостина А.К.); сайыҥҥы сахалыы ырыаҕа Нарияна Находкина бастаан бэлэх тутта.
Оттон спорту сэҥэрээччилэр саха норуота сөбүлүүр атах оонньуутугар кииристилэр. Ити күрэххэ эр дьоҥҥо Андрей Кынньахыров иннин кимиэхэ да биэрбэтэ, онтон дьахталларга Варвара Старостина кыайыыны ситистэ. Ыһыах киэһэ аһаҕас халлааҥҥа үҥкүүнэн түмүктэннэ.
Мария Иванова,
общ. корр. Бороҕон