Андрей Никитин үлэһит идэтин баһылаата
Үлэ киһини киэргэтэр. Бу мындыр этиинэн салайтаран мин быйыл автодорожнай техникуму бүтэрэн кэлэн машинист-бульдозерист идэтин баһылаан Тиксии биир тэрилтэтигэр үлэлии сылдьар Андрей Никитинниин көрүстүм. Андрей Күһүүр нэһилиэгиттэн төрүттээх, уон биирис кылааһы Нерюнгри куорат Арктика оскуола-интернатыгар бүтэрбитэ.
Арктика оскуола-интерната аһыллыаҕыттан Күһүүртэн элбэх оҕо үөрэннэ. Үксүлэрэ салгыы үрдүк үөрэх кыһатын бүтэрэн, номнуо үлэһит дьон буолуталаатылар. Оскуола- интерннат аҕыйах ахсааннаах төрүт омук оҕолоругар үтүөтэ-өҥөтө элбэх. Биир сүрүнэ – оҕону олоххо бэлэмнээх буоларыгар улахан кыһамньы ууруллар. Үөрэнээччи майгытыгар-сигилитигэр үтүө өрүттэрин бэлиэтээн, итэҕэстэрин туоратар соруктары ыйан туран, оҕо оскуоланы бүтэрэригэр кэлэр өттүгэр туһалыыр киэҥ психологическай характеристика бэриллэр.
Арктика оскуола-интернатын бүтэрбит Күһүүр оҕолоруттан этэҥҥэ үгүстэрэ олоххо бэйэлэрин миэстэлэрин буларга дьулуурдара улахан. Ол курдук, Андрей оскуола-интернаты бүтэрээт армияҕа ыҥырыллан Челябинскай куорат военнай чааһыгар сулууспалаабыт. Ийэ дойдутугар ытык иэһин толорон кэлэн автодорожнай техникумҥа үөрэнэн бүтэрдэ.
Андрей төрөппүттэрэ үлэһит дьоннор – аҕата балыксыт, ийэтэ оскуолоҕа үлэлиир, балта үрдүк үөрэххэ үөрэнэр. Уопсайынан халыҥ аймах үлэһит дьон Никититтэри уонна ийэлээх аҕатын туйахтарын хатаран Андрей үтүө үлэһит киһи буолуо диэн эрэнэбин.
Татьяна Слепцова
Фото автора