Хоту дойду хоннохторунан: Дойдуларыгар бэриниилээх Алексеевтар
Хара-Уулаах нэһилиэгэр дьиэ табатын иитиитинэн “Приморскайдааҕы” МУТ дьарыктанар. Дириэктэринэн Владимир Алексеев үлэлиир.
Владимир Владимирович хаһаайыстыбатын түбүктээх үлэтин таһынан нэһилиэк бары араҥатыгар көмөлөһөр киһинэн буолар. Кини хоту дойду кылгас сайыныгар кыстыкка бэлэмнэнии үлэтин былааннаахтык ыытар. Ол курдук, кини быһаччы дьаһалынан иккис сайынын Найба олохтоохторо бородууктанан, олоххо-дьаһахха наадалаах тэриллэринэн, уу суолунан хааччыллар буоллулар. Онон тэрилтэлэр да, дьон да махтала улахан.
Быйыл да үлэһит салайааччы сүүрэн-көтөн, бэйэтин табаһыттарын наадаларын таһынан, нэһилиэк тэрилтэлэрин сайаапкаларынан киин сиртэн тиэйэр-таһар үлэтин саҕалаата. Бэлиэр, бастакы уу суолунан тутуу матырыйааллара Тиксиигэ диэри кэлбиттэр. Атырдьах ыйыгар эбии бородууктаны кытта ити матырыйааллары Найбаҕа тиэрдиэҕэ.
Быйыл Владимир Владимирович көмөтүнэн орто оскуола дьиэтин тимир олбуора оҥоһулла турар. Урукку өттүгэр мас олбуордаах этэ. Иккис сылын нэһилиэк баанньыгын МУТ арендаҕа ылан үлэлэтэр. Дьон абыранныбыт диэн кэпсииллэр. Ити кэлбит тутуу матырыйаалынан баанньык дьиэтигэр өрөмүөн ыытыллыахтаах.
Аны муоранан устан кэлэн кытылга быраҕыллар маһы хомуйан, оһох оттугар бэлэмнииллэр. Тиэйэн аҕалан наадыйыр тэрилтэлэри, чааһынай ыаллары хааччыйаллар. Нэһилиэккэ тутуллан эрэр саҥа хочуолунайга МУТ тырааныспарынан, үлэһит илиинэн көмөлөһөн сүрүн күүс буолар. Бу курдук Найба нэһилиэгэ күннээҕи түбүктээх үлэтигэр Владимир Владимирович үтүөтэ аҕыйаҕа суох.
Ситэрэн кэпсиир буоллахха Владимир үлэ бэтэрээнэ, аатырбыт механизатор, 80 сааһыгар үктэммит Владимир Сергеевич Алексеев уола. Үлэһит киһи оҕото үлэһит буолар диэн манныгы этэн эрдэхтэрэ. Аҕата уолугар сүрүн көмөлөһөөччү, бэйэтин вездеходунан нэһилиэккэ наадалаах үлэни кыһыннары-сайыннары барытын толорор.
Татьяна Слепцова