Бороҕоҥҥо от үлэтэ саҕаланна
Атырдьах ыйын 4 күнүнээҕи туругунан, Бороҕон нэһилиэгин дьаһалтатын сүрүннүүр исписэлииһэ Иннокентий Иванов иһитиннэриитинэн Намыыга от үлэтэ саҕаланна.
“Күн дьыл тымныы буолан хойутааһын баар. Бу күннэргэ сотору-сотору түһэн ааһар ардах мэһэйдээтэ. Отчуттар Намыыттан чугас сытар ходуһаларга, ханна үүммүтүнэн көрөн, оттуу сылдьаллар”, – диэтэ кини.
Ынах сүөһүнү иитэр соҕотох бааһынай хаһаайыстыба үлэһиттэрэ эмиэ күнү-дьылы баттаһа окко киирдилэр. Хаһаайыстыбаҕа сылы тахсарга 60-ча тонна от оттонуохтаах. От үчүгэйдик үүнэр Эҥэ күөл, Чорохойдоох сыһыыларынан оттууллар. Оту илии хотуурунан охсоллор. Онон барыта илии үлэтэ.
Хаһаайыстыба 27 сүөһүлээх, ыанар ынаҕа 12. Салайааччылара Роман Бурцев кэпсииринэн, үлэһиттэр эдэр саастарыттан тыа хаһаайыстыбатынан дьарыктаммыт уопуттаах дьон.
Билигин урукку буолбатах, эдэр дьон сүөһүгэ сыстыбат. Ол иһин ынах сүөһү аҕайаан иһэр. Иитэр сүөһүбүтүгэр тиксэр көмө харчыны – субсидияны – кэмигэр ылан иһэллэрин эттилэр. “Нэһилиэкпит улуус кииниттэн ыраах сытар буолан, ыарахаттар элбэхтэр, айаҥҥа тахсар кыһалҕалар, уматык сыаната ыараан иһэрэ барыта атахтыыр”, – дииллэр кинилэр. Биллэн турар, бу ыарахаттар сүөһү төбөтүн элбэтиигэ мэһэйдииллэрэ чахчы. “Хоту улуустарга сүөһү иитиитинэн дьарыктанар дьоҥҥо, хаһаайыстыбаларга эдэр сүөһү төбөтүн элбэтиигэ интириэһи үөскэтэр миэрэлэр бааллара буоллар ордук буолуо этэ”, – диэн Роман Борисович санаатын этэр.
Бороҕон нэһилиэгин отчут дьонугар атырдьах ыйын үтүө күннэрэ туран, кыайа-хото оттоон хаалалларыгар, кэлэр кыһыны ынах-сүөһү этэҥҥэ туоруурун курдук баҕа санаабытын тиэрдэбит.
Татьяна Слепцова
Хаартыска редакция архыыбыттан ылылынна