Намыы сайына дьону үлэҕэ көҕүлээтэ
Сайыммыт барахсан саймааран, итиитинэн илгийэн аҕыйах да күн буоллар кэллэҕэ. Бороҕон дьоно-сэргэтэ уруккуттан үлэһит дьонунан биллэр. Онтон ханнык да кэмнээҕэр саамай түбүктээҕинэн сайын буолар. Кыһынын сылгы, сүөһү сиир отун оттооһуҥҥа бар дьон түмсүүлээхтик үлэлээтэ. Ол курдук үлэһиттэр уонна эдэр ыччат мустан бөһүөлэк биир ытыктанар кырдьаҕаһыгар Валентина Ефремовна Стручковаҕа от үлэтигэр күүс-көмө оҥордо.
Онтон үлэтэ суох дьон 15 күҥҥэ аҥаардаһан эмиэ сүөһүлээх дьоҥҥо оттоһоллор. Маны таһынан аҕыс оҕо Татьяна Пиковна салайааччылаах от лааҕырыгар сылдьар.
Дьахталлар быыс булан тыаҕа тахсан морооскуланаллар, тэллэй хомуйаллар, күөгүгэ балык хаптараллар. Дьэ, бу курдук нэһилиэк дьоно сайыны атаарар уонна көмүс күһүнү көрсөргө бэлэмнэнэр.
Любовь Никитина