КСК спортивнай күрэхтэрин хапсаҕай хапсыһыылара түмүктээтилэр
2016 сыл түмүктэнэр ыйыгар, ахсынньы 25 күнүгэр, спорду өрө тутааччыларга, кэрэхсээччилэргэ анаан Култуурнай-спортивнай комплекс саалатыгар хапсаҕай тыҥааһыннаах киирсиилэригэр күүстээх-уохтаах спортсменнар күөн көрүстүлэр.
Күрэхтэһии икки ыйааһын бөлөҕүнэн барда – 70 киилэҕэ диэри уонна 70 үөһээ. Бастыыр иһин киирсиилэр ханна да буоларын курдук өрө күүрүүлээхтик аастылар. 70 киилэҕэ диэри бөлөх финалыгар Шамаев Сим уонна Самойлов Жан көрөөччүлэргэ бэртээхэй тустууну көрдөрдүлэр. Өр эрийсиилээх киирсии кэнниттэн бу ыйааһыҥҥа муҥутуур кыайыылааҕынан таҕыста Жан Самойлов, иккис миэстэҕэ тигистэ Сим Шамаев, үһүскэ – Харысхан Попов. Онтон 70 киилэни үөһээ үктүүр эр дьоҥҥо Селиванов Иван тэҥнээҕин булбата, иккиһи ылла Попов Ариян, үһүскэ – Александр Манхаев. Бэлиэтээн этэр буоллахха, бу хапсаҕайга үс байыаннай сулууспалаах кыттыыны ылла. Ол курдук, үһүс миэстэҕэ тиксибит Александр Манхаев кинилэртэн биирдэстэринэн буолар.
Тиксии бөһүөлэгин хапсаҕайы өрө тутааччылара Саҥа дьыл буолуон иннинэ бэйэлэригэр бэртээхэй бэлэх оҥоһуннулар уонна 2016 сылы кыайыы өрөгөйүнэн түмүктээтилэр.
Харысхан ПОПОВ
Ульяна Попова хаартыскаҕа түһэриилэрэ