Улууска икки эрэ сибиинньэ баар
Ааспыт сыл сайыныгар Валерий Каурцев бэйэтин баҕатынан Муустаах муора кытылыгар, Тиксиигэ, сибиинньэ аҕалан, көрөн-истэн, хаһаайыстыба тэриммитэ. Сибиинньэлэр билиҥҥи туруктарын билэ-көрө, Валерий Сергеевиһы кытары кэпсэтэ киниэхэ тиийэ сырыттым. Хотоҥҥо икки сибиинньэ баар. Биирэ бу саас кулун тутар ыйга төрүөхтээҕин хаһаайын этэр.
Санатар эбит буоллахха, Тиксии бөһүөлэгэр Сэбиэскэй кэм саҕана ынах, сибиинньэ иитэ сылдьыбыттара.
Билигин Булуҥ улууһун үрдүнэн соҕотох фермер икки сибиинньэни иитэр эбит буоллаҕына, оччолорго оройуоҥҥа 100-кэ сибиинньэ баар буола сылдьыбыт.
– Сибиинньэлэрим үчүгэй туруктаахтар, ыйааһыннарын эбиннилэр. Күҥҥэ иккитэ аһыыллар. Хаһаайыстыбабар уолаттарым, аймахтарым күүс-көмө буолаллар. Төрүөхпүт үчүгэйдик аастаҕына, аны күһүн бэйэбит улууспут дьонун сибиэһэй этинэн хааччыйыахпыт.
– Бу бизнескин саҕалыыргар салалтаттан көмө көрүлүннэҕэ?
– Бастаан бу дьыаланы саҕалыырбар оройуоннааҕы тыа хаһаайыстыбатын салалтата харчы көрбүтэ, онон сибиинньэлэрбин уонна контейнер атыыласпытым. Бизнескэ сыһыана суох киһи буоларым быһыытынан, маҥнай хаһаайыстыба тэринэрбэр ыарахаттардаах этэ. Бизнес-былаан оҥорорбор тыа хаһаайыстыбатын исписэлиистэрэ көмөлөспүттэрэ. Ону таһынан улуус ветеринардарын кытары үлэлэһэбин, сүбэ-ама биэрэллэр. Холобура, сибиинньэлэрим аһаабат буола сылдьыбыт кэмнэригэр кэлэн укуол туруоран, битэмиин биэрэн барбыттара.
Сибиинньэ хотонун бэйэбит үппүтүнэн бу күһүн уолаттарбынаан уонна аймахтарбынаан көмөлөөн өрөмүөннээбиппит. Манна улуустааҕы "Сахаэнерго" үлэһиттэрэ уот тардан көмөлөһөн абыраабыттара. Саас уонна күһүн сибиинньэм төрүөх биэрдэҕинэ, саҥа киэҥ-куоҥ дьиэҕэ көһөр былааннаахпыт. Ол туһунан бу күннэргэ улуус баһылыгар Игорь Кудряшовка эппитим. Улуус салалтата бу хайысха сайдарыгар интэриэстээҕин биллэрбитэ.
Уотурбаны атыылаһабыт. Бөһүөлэк маҕаһыыннара, нэһилиэнньэ сибиинньэлэрбэр эбии ас тобоҕун биэрэллэрэ үөрдэр. Саҕалыырым саҕана тугунан аһатарбын да билбэт этим диэххэ сөп.
Техникабыт суох буолан, наадалаах малларбытын барытын илиибитинэн таһабыт. Бу сылга “Эдэр фермер” бырагырааммаҕа киирсиэхпин баҕарабын. Ханнык докумуоннар наадаларын тыа хаһаайыстыбатын управлениета быһааран биэрбитэ.
Атахпытыгар турдахпытына кэҥиэхпит. Холобура, сибиинньэлэр турар сирдэригэр ититии систиэмэтин киллэриэхпит уонна уу хачайдыыр носуос, хочуол ылыахпыт. Санаабытын түһэрбэтэхпитинэ сайдыы баар буолуо, инники былааннар үчүгэйдэр, уолаттар үлэлииллэр. Ил Дархан Егор Борисов көмөлөһүөх буолан эрэннэрбитэ, онон салгыы үлэлиибит.
Харысхан ПОПОВ
Ааптар хаартыскаҕа түһэриитэ.