Чөл олох уонна спорт
Аан дойду оҕото, дьоно футбол оонньуутун бары кэриэтэ сөбүлээн оонньуур. Тиксиигэ өрөбүл күн Култуурнай-спортивнай комплекска үөрэнээччилэр мини-футбол көрүҥэр бастыыр иһин күрэхтэстилэр.
Оонньууга бөһүөлэк 5 саамай күүстээх хамаандата көрүстэ. Билэрбит курдук, хас биирдии хамаанда састаабыгар 7-8 киһи кыттар. Уолаттар бары мини-футбол секциятыгар сылдьан дьарыктанар оҕолор. Александр Гуков иһитиннэриитинэн, турнир круговой систиэмэнэн барбыт, ол түмүгүнэн, элбэх очкону ылбыт бастыҥ хамаандалар ааттаммыттар. Тэрийээччилэр икки полуфинал ыыппыттарыттан, кыайыылаах тахсыбыт хамаандалар финалга бастыыр иһин оонньообуттар.
Оонньуулар түмүктэринэн, бүтэһик сылларга призердар кэккэлэригэр сылдьыбыт “Норд” “Белые медведи” хамаанданы хотон, кыайыы үөрүүтүн биллэ. ““Норд” оонньооччулара үс бүтэһик сылларга сайдыбыттарын уонна уопутурбуттарын көрдөрдүлэр. Хамаанда сүрүн састааба 9 кылаас үөрэнээччилэриттэн турар. Бэлиэтээн этэр буоллахха, “Белые медведи” бүтэһик икки сыл тухары иннин кимиэхэ да биэрбэтэх, кыайыы өрөгөйүгэр сылдьыбыт хамаанда. Үһүс бочуоттаах миэстэҕэ ДЮСШ хамаандата таҕыста”, – диэн Александр Юрьевич кэпсиир.
Билигин секцияларга сылдьааччы дьон ахсаана биллэ элбээбит. ДЮСШ үлэһиттэрин сүрүн сыаллара-соруктарынан буолар маассабай спорду сайыыннарыы. “Дьон буортулаах үгэстэн тэйэн, чөл олоххо тардыһыахтаах. Спордунан дьарыктанарга билигин усулуобуйа бөҕөтө баар. Холобура, КСКҕа араас үгүс спортивнай секциялар үлэлииллэр. Билиҥҥи бириэмэҕэ футболунан дьарыктаныан баҕалаах киһи ахсаана элбээтэр элбээн иһэр”, – диэн ДЮСШ дириэктэрэ санаатын үллэстэр.
Харысхан ПОПОВ
Александр Гуков хаартыската