Ахсыс өрөспүүбүлүкэтээҕи “Саха сирин лидер кыргыттара” форум
Өрөбүл күннэргэ Дьокуускайга ХИФУ УЛК дьиэтигэр “Билиҥҥи XXI үйэ кыыһа хайдах буолуохтааҕый?” диэн тиэмэлээх өрөспүүбүлүкэтээҕи форум буолан ааста. Форумҥа билиҥҥи кыыс хайдах буолуохтааҕын, сайдыахтааҕын уонна бэйэтин быраабын билиэхтээҕин туһунан тула кэпсэтиилэр аастылар.
Тэрээһиҥҥэ Булуҥ улууһуттан үс бэрэстэбиитэл кыттыыны ылла. Кыргыттар үһүөн ХИФУ устудьуоннара: педагогическэй институтка үөрэнэр Наталья Шубина (Күһүүр), тыл уонна култуура институтун (саха тыла уонна култуурата) иккис кууруһун устудьуонката Мотрена Никитина (Хара-Уулаах) уонна Тиксииттэн психология институтугар үөрэнэр Ангелина Стручкова.
Биһиги кыргыттарбыт лидердээһин (лидерство) уонна ораторскай искусство семинардарыгар сылдьыбыттар. “Лидер” диэн тыл туох суолталааҕын кэпсэппиттэр, лидер дьахтар хайдах буолуохтааҕын, ханнык хаачыстыба лидер буоларга наадалааҕын, ол хаачыстыбаны хайдах сайыннарыахха сөбүн ырытыспыттар. Ораторскай искусство семинарыгар ыраастык саҥарарга, тутта-хапта сылдьарга үөрэппиттэр.
Эбиэт кэннэ туспа салааларынан арахсан үлэлээбиттэр. Ол курдук, Мотрена – “Саморазвитие девушки”, Ангелина – “Социальная защита и правовая грамотность”, Наталья – “Красота и здоровье” секцияларынан сылдьыбыттар. “Саморазвитие девушки” диэн салааҕа биллиилээх инстаграмм ситиминэн хаартыскаларын таһаарар кыргыттар кэлэннэр хайдах ситиһиилээх буолбуттарын кэпсээбиттэр. Онтон “Красота и здоровье” секцияҕа сөпкө аһааһын, спордунан дьарыктаныы, чөл олоҕу тутуһуу, доруобуйаны харыстаныы туһунан туһалаах сүбэлэри биэрбиттэр.
Кыргыттарга барыларыгар форумҥа кыттыбыттарын туһунан сертификат туттарбыттар.
“Социальная защита и правовая грамотность” секция кыттыылааҕа Ангелина Стручкова:
– Мин бу форумҥа иккис төгүлүн кыттыыны ыллым. Бу талбыт хайысхабар социальнай көмүскэл үлэһиттэрэ кэлэн, дьахтар быраабын туһунан сиһилии кэпсээбиттэрэ, практическэй сорудахтары толорбуппут. Секция түмүктэниитэ сүбэ-ама биэрбиттэриттэн туох туһаны ылбыппытын, бэйэбит санаабытын эппиппит. Ону таһынан специалистары кытары биирдиилээн бэсиэдэлэр, кэпсэтиилэр буолбуттара.
Тэрээһин наар буоларын курдук үрдүк таһымнаахтык ааста. Булуҥ улууһуттан бу бастакы кыттааһыным буолар. Маннык тэрээһиннэри элбэхтэ ыыталлара буоллар өссө үчүгэй буолуо этэ.
Харысхан ПОПОВ
Ангелина Стручкова хаартыската