Месячник чаҕылхай тэрээһинэ – фестиваль
Билиҥҥи кэмҥэ патриотическэй иитиигэ үөрэх тэрилтэлэригэр улахан үлэ барар. Ол курдук уһуйааннартан саҕалаан, оскуоланы бүтэриэхтэригэр диэри оҕолорго патриоттуу санааны иитэргэ педагогтар кылааттара кырата суох.
Улуус оскуолаларыгар, үгэс быһыытынан, Аҕа дойдуну көмүскээччи күнүгэр аналлаах байыаннай-патриотическэй иитиигэ месячник түмүктэнэн эрэр. Месячник улаатан эрэр оҕолорго Аҕа дойду историятын умнубакка, харыстыыр сыаллаах-соруктаах ыытыллар, эт-хаан өттүнэн үчүгэй бэлэмнээх гына иитэн таһаарарга дьулуһар.
Былаан быһыытынан араас тэрээһиннэр буолан аастылар, ол иһигэр, төгүрүк остуоллар, кылаас чаастара, кылаастарынан хаамыы уонна ырыа күрэхтэрэ.
Арктика гимназиятыгар үөрэнээччилэр “Герой куораттар”, “Аҕа дойду сэриитин геройдара” диэн тиэмэҕэ бырайыак оҥорон көмүскээбиттэр.
Саамай чаҕылхай тэрээһининэн олунньу 28 күнүгэр Аҕа дойдуну көмүскээччи күнүгэр аналлаах байыаннай ырыа фестивала буолла. Гимназия дириэктэрин иитэр-үөрэтэр үлэҕэ солбуйааччы Светлана Федорова этэринэн, фестивалга оскуола алын кылааһын үөрэнээччилэрэ байыаннай хоһооннору ааҕан, ырыалары ыллаан, көхтөөх кыттыыны ылбыттар. Хас биирдии кылаас Аҕа дойду Улуу сэриитин саҕанааҕы ырыалары уонна кэнники кэмҥэ айыллыбыт аныгы байыаннай ырыалары ыллаабыттар. Кырачааннар хос эһээлэрэ Аҕа дойду Улуу сэриитин толоонугар сылдьан, айбыт хоһооннорун доргуччу ааҕан, төрөппүттэрин долгуттулар, үөртүлэр. Ырыа бырааһынньыгар оҕолорун көрө, өйүү үгүс төрөппүт кэлбит. Ону таһынан, тэрийээччилэр ыалдьыттарга байыаннай киинэлэр хроникаларын көрдөрбүттэр.
Бэлиэтээн эттэххэ, олунньу ыйга күн-дьыл туран биэрбэккэ, буурҕа ытыйан, онуоха эбии оскуолалар карантиҥҥа сабыллан, ыытыллыахтаах тэрээһиннэр атахтанан, уһаан-кэҥээн биэрбиттэр.
Маны таһынан, сыл аайы улууска ыытыллар "Снежный барс" күрэххэ Арктикатааҕы гимназия үөрэнээччилэрин хамаандата билигин дьаныардаахтык бэлэмнэнэ сылдьар. Тоһоҕолоон этэр буоллахха, "Снежный барс" кулун тутар 5 күнүгэр ыытыллара былааннанар, улуус оскуолалара бары кытталлара күүтүллэр.
“Байыаннай-патриотическэй иитиигэ месячник иһинэн, бүтүн Арассыыйа үрдүнэн ыытыллыбыт "Семейные реликвии" диэн куонкуруска биһиги оскуолабытыттан биэс алын уонна биир 6 кылаас үөрэнээччилэрэ кыттыыны ыллылар. Ол курдук, оҕолор Аҕа дойду Улуу сэриитигэр кыттыыны ылбыт эһээлэрин, хос эһээлэрин тустарынан бэрт интириэһинэй, дьиэ кэргэннэрин архыыбыттан ылыллыбыт хаартыскалардаах, сэриигэ кыттыбыттарын туһунан архыып докумуоннардаах киэҥ ис хоһоонноох бырайыактары оҥорон таһаарбыттара. Үлэлэри киин хамыыһыйаҕа ыыппыппыт, билигин түмүктэри кэтэһэбит”, – диэн Светлана Викентьевна кэпсиир.
Кэнники сылларга Дойдубут үрдүнэн оҕолорбутугар анаан, бэйэлэрин дьиэ кэргэннэрин, өбүгэлэрин билэллэригэр тустаах араас куонкурустар элбээбиттэрэ киһини үөрдэр... Чахчы, патриотизм төрөппүттэргэ, төрөөбүт дьиэҕэ, нэһилиэккэ, улууска, өрөспүүбүлүкэҕэ, биир тылынан эттэххэ, Ийэ дойдуга тапталтан саҕаланар.
Харысхан ПОПОВ
Фото Анатолия Иванова