Айылҕаны харыстыыр туһунан кэпсэтиилэр
Кулун тутар 3 күнүгэр тулалыыр эйгэ харыстабылыгар федеральнай сокуоҥҥа уларытыылар киирбиттэринэн сибээстээн, улуус дьаһалтатын дьиэтигэр Булуҥнааҕы айылҕа харыстабылын инспекциятын салайааччыта Иннокентий Стручков уонна судаарыстыбаннай инспиэктэр Валерий Слепцов оройуон тэрилтэлэрин исписэлиистэригэр билиһиннэрэр семинар-кэпсэтии ыыттылар.
Биллэрин курдук, 2017 сыл Дойду президенэ Владимир Путин Укааһынан, Арассыыйа үрдүнэн Экология сылынан биллэриллибитэ.
Маннык быһаарыныы сыала-соруга – экологическэй эйгэҕэ баар кыһалҕалаах боппуруостарга болҕомтону ууруу, дойдубут айылҕатын туругун куттала суох буолуутун тупсарыы уонна харыстааһын үлэтэ.
Санатар эбит буоллахха, Экология сылын олунньу 24 күнүгэр Тиксии Култуурнай-спортивнай комплексыгар аспыттара. Ол күнтэн ыла Булуҥ улууһугар Экология сыла саҕаланан, күнэ ааҕыллан барбыта.
Семинарга сүрүн кэпсэтии тулалыыр эйгэҕэ куһаҕаннык дьайар эбийиэктэри судаарыстыбаннай учуокка туруоруу уонна айылҕаҕа куһаҕан дьайыылары сабыдыаллааһын төлөбүрэ диэн тиэмэлэринэн барда.
Булуҥ улууһугар эбийиэктэри учуокка киллэрэргэ анаан тэриллибит хамыыһыйа үлэтин саҕалаан эрэр. Хамыыһыйаҕа киирдилэр: улуустааҕы налоговай сулууспа, ИДьМ, айылҕа харыстабылын инспекциятын үлэһиттэрэ уонна оройуон дьаһалтатыттан бэрэстэбиитэл. Мантан ыла хамыыһыйа хас кыбаартал аайы мустан мунньахтыа.
Айылҕа харыстабылын судаарыстыбаннай инспиэктэрэ Валерий Федорович үлэлэригэр 2017 сылга туох саҥа уларыйыылар киирбиттэрин билиһиннэрдэ. Кини эбийиэктэр айылҕаҕа куһаҕан дьайыылары оҥоруу содула улаханын туһунан, ыстарааба бөдөҥ буоларын кэпсээтэ.
Валерий Слепцов түмүктээбитин кэннэ, мунньахха кэлэн кыттыыны ылбыт дьон, тустаах үлэһиттэртэн бэйэлэрин интириэһиргиир боппуруостарын ыйыттылар. Айылҕаны харыстааһыҥҥа үлэлэһэр исписэлиистэр ыйытыы биэрбит дьоҥҥо толору сөптөөх хоруйдары биэрэн, быһааран биэрдилэр.
Инникитин ыытыллар семинардарга ыҥырыылаах тэрилтэ үлэһиттэрэ бары көхтөөхтүк кыттаргытыгар ыҥырабын. Улууспут айылҕатын харыстааһыныттан саҕалаан, дойдубут сирин-уотун харыстыах, тулалыыр эйгэбитигэр убаастабыллаахтык сыһыаннаһыах.
Булуҥ улууһун айылҕа харыстабылын инспекциятын салайааччыта Иннокентий Стручков:
– Билигин тэрилтэлэр судаарыстыбаннай учуокка тураллара ирдэнэр. Кинилэртэн киирбит харчы барыта оройуон бюджетыгар киириэ. Оччоҕо оройуоҥҥа үлэ тахсыа этэ буоллаҕа. Төлөөбөккө турар тэрилтэлэр биһиги оройуоммутугар суох буолбатахтар, бааллар. Ол иһигэр, гараастар эрэ буолбатах, холобура ким эрэ дизелнэйдээх, ким эрэ хочуол оҥостор, ону таһынан, тэрилтэлэртэн отчуотунас ирдэнэр буолуоҕа. Салҕыы инник семинардары, үлэлэри ыытан иһиэхпит. Бу буолан ааспыт семинарга бэлэмнэммиппит ыраатта. Бастакы ыыппыт семинарбыт инник буолан ааста.
Харысхан ПОПОВ
Фото автора