Улаханныын кыралыын – бары библиотекаҕа!
Саха сирин хас биирдии ааҕар киинин дьиэлэрэ нэһилиэгин дьонун, кыра эрдэхтэриттэн билиилээх дьон буолан таҕыстыннар диэн үлэлэһэллэр. Ол курдук духуобунай баайы дьоҥҥо тиэрдэр тэрилтэнэн библиотека буолар.Антонина Самойлова бэйэтин төрөөбүт-үөскээбит Сииктээх нэһилиэгэр библиотекаҕа 2016 сыл муус устар ыйыттан кылаабынай библиотекарынан үлэтин саҕалаабыта.
Үлэлээбэтэҕэ быданнаабыт, ону таһынан өрөмүөн диэни көрбөтөҕө ырааппыт библиотеканы туппут. Эдэр исписэлиискэ улуус дьаһалтата өрөмүөҥҥэ үп көрөн көмөлөспүт. Онон сайыҥҥы бириэмэҕэ уунан суол баарына матырыйаал аҕалтаран, тута тутуу дьонун булан, дьиэҕэ толору өрөмүөн үлэтэ барбыт. Дьиэ иһигэр улахан үлэ ыыппыт, ол курдук библиотека туох баар кинигэтин барытын саҥалыы ааҕан, көрүҥнэринэн арааран, долбуурдарынан уурталаабыт.
Библиотекаҕа үксүн сахалыы тыллаах кинигэ элбэх эбит. Быйыл Саха сирин биллиилээх дьоннорун тустарынан саҥа ахтыылар, ону таһынан олоҥхо айымньытын кинигэлэрэ кэлэн, долбуурдарын өссө киэргэтэн, эбэн биэрбиттэр. Нэһилиэк дьоно ордук сахалыы тыыннаах уус-уран айымньылары ордорон уонна сөбүлээн ааҕаллар. Бэлиэтээн эттэххэ, нэһилиэк дьоно саха биллиилээх суруйааччыларын айымньылара, уус-уран кэпсээннэрэ аҕыйаҕын, ол оннугар үксүн ахтыы кинигэлэрэ дэлэйин санааларын үллэстэ кэпсииллэр. Манна даҕатан эттэххэ, оскуола үөрэнээччилэрэ үксүн сахалыы сурунааллары ылсан ааҕаллар эбит.
Сииктээх ааҕар киинин дьиэтэ дьону араас тэрээһиннэринэн интириэһиргэтэр, ол курдук нэһилиэнньэни библиотекаҕа чугаһатар сыаллаах үлэ утумнаахтык барар. Ыытыллар тэрээһиннэргэ үксүн оскуола үөрэнээччилэрэ уонна нэһилиэк ытык кырдьаҕастара көхтөөх кыттыыны ылаллар. Орто саастаах дьон уонна чуолаан ыччат, хомойуох иһин, соччо сэргээн кэлбэт. Ону ол диэбэккэ, Антонина ааҕааччыны тардыыга араас тэрээһини ыытарын тохтоппот.
Инникитин кинигэни таптаан ааҕааччылар Интернет ситимин нөҥүө киирэн, кинигэлэр испииһэктэриттэн талан ылан ааҕар уонна инновация киирэригэр баҕа санаалаахтар. Ону тэҥэ элбэх араас жанрдаах кинигэ киирэрин эрэнэ күүтэллэр, чуолаан сахалыы уус-уран айымньылары, кэпсээннэри кэтэһэллэр. Кинигэ барыта ахтыы кэпсээннэр буолан, олохтоохтор кинигэҕэ интириэстэрэ сүппэтин туһугар саҥаттан саҥа айымньылары, дьон-сэргэ билиҥҥи сайдыылаах олоҕу кытта тэҥҥэ хардыылаан култуура уонна духуобунас өттүнэн сайдалларын туһугар киэҥ хабааннаах үлэни ыытарга Антонина Алексеевна ылсан үлэлэһэр. “Сыллааҕы түмүгүнэн 120 ааҕааччылаахпыт. Библиотекаҕа күҥҥэ хас киһи кэлэрин чопчу этэр кыаҕым суох, быһа холоон 10 тахса киһи кэлэн барар. Араас таһымнаах мероприятиялары, билиилэрэ хаҥаатын, кинигэни аахтыннар диэн оҕолорго тэрийэ сатыыбын.
Бу 2017 сылга оскуола үөрэнээччилэригэр анаан араас интириэһинэй оонньуулар, бэсиэдэлэр, уруоктар, презентациялар уонна кинигэ быыстапкалара буолан аастылар.
Аны туран, хаһыакка сурутуубут олус хойутаан кэлэр, холобура, улуустааҕы хаһыаппытын“Арктика майааҕын” сонуна ааспытын кэннэ тутабыт. Салалта өттүттэн ити боппуруоска болҕомто ууруллан, кэмиттэн кэмигэр сибиэһэй сонуннаах хаһыат кэлэрэ буоллар диэн дьон этинэр”,– диир Антонина Самойлова.
Харысхан ПОПОВ
Антонина Самойлова хаартыскалара