Бырабыыталыстыба отчуоттуур бөлөҕө Бороҕоҥҥо үлэлээтэ
Кулун тутар 9,10 күннэригэр чуолаан Бороҕон олохтоохторугар болҕомто ууран, Бырабыыталыстыба отчуоттуур бөлөҕө хаттаан кэлэн, Булуҥ улууһугар үлэтин салҕаата. Санатар эбит буоллахха, Саха сирин Бырабыыталыстыбатын бэрэссэдээтэлин бастакы солбуйааччыта Алексей Колодезников салайааччылаах бөлөх үлэлиир графиктарыттан тахсан, ыраах сытар Бороҕон нэһилиэгэр сатаан көппөккө хаалбыттара.
Атыылаһыы эйгэтигэр хантыраак тиһигин сүрүннүүр судаарыстыбаннай кэмитиэтин бэрэссэдээтэлэ Попов Александр Иванович салайааччылаах сэттэ киһилээх хамыыһыйа кулун тутар 10 күнүгэр Бороҕоҥҥо көппүтэ. Олохтоохтортон маннык тыын боппуруостар киирдилэр: үчүгэй туруктаах суол оҥоһуллуутун, ол курдук, бороҕоттор ааспыт сылга суол суох буолан, эрэйи көрдүлэр; иккиһинэн, сылгыга, ынахха от аҕалтарыытын; ону таһынан, саҥа котельнай тутуутун туһунан. Санатан эттэххэ, бу сылга ититэр систиэмэлэрэ эргэрэн, кыс ортото үлэҕэ улахан харгыстары таһааран, дьону куттуу сылдьыбыта.
Хамыыһыйа дьон-сэргэ санаатын истэн, толору эппиэттэри биэрдэ. Ол курдук, суол оҥоруутугар аҕыйах кэм иһигэр боппуруос быһаарыллыа диэн эрэннэрдилэр. Сүөһү аһылыгар, отторо барыта бэлэм турарын, кыһыҥҥы суол сабыллыан иннинэ массыыналарынан тиэрдиллиэхтээҕин биллэрдилэр. Хомойуох иһин, бу сылга Бороҕоҥҥо саҥа котельнай тутуллуута былааҥҥа суоҕун эттилэр. Нэһилиэк дьоно ыйытыыларыгар толору хоруй ылан, көрсүһүүттэн санаалара көнөн, инникилэригэр эрэллээх, сүргэлэрэ көтөҕүллэн тарҕастылар.
Саха сирин толорор былааһа Арктика улуустарын биирдиилээн нэһилиэктэригэр болҕомто уурара олус үчүгэй, хайҕабыллаах дьыала. Ол аата, былаас хас биирдии киһиэхэ кыһанарын бэлиэтэ.
Бэрэстэбиитэллэр бу да сырыылара ытыллар улахан тыал түһүөн эрэ иннинэ, кыл мүлчү баттаһа кэлэн бардылар. Онон, өрөспүүбүлүкэбит салаайааччылара Сахабыт сирин “Буурҕалаах Булуҥ” диэн аатырар улуус силлиэ буурҕатын билэн-көрөн бардахтара.
Харысхан ПОПОВ