Экология уонна Ыччат сыла
Кулун тутар 22 күнүгэр Тиксиигэ дьаһалта дьиэтин аактабай саалатыгар улахан конференция ыытыллара күүтүллэр. Конференция тематынан Булуҥҥа Экология уонна Ыччат сылларын ыытыы буолар. Бу туһунан Булуҥнааҕы айылҕа харыстабылын инспекциятын салайааччыта Иннокентий Стручков иһитиннэрдэ.
Конференция дьаһалта дьиэтин үлэһиттэрин көҕүлээһининэн ыытыллыаҕа. Мунньах икки блогунан арахсан үлэлиэ. Тустаах салайааччылар түмсүбүт дьоҥҥо Экология уонна Ыччат сылларын чэрчитинэн туох үлэ барарын билиһиннэриэхтэрэ.
Маҥнайгы блок Экология сылыгар ананар. Айылҕа харыстабылын инспекциятын исписэлиистэрэ Булуҥ улууһугар Экология сылын чэрчитинэн былааннаммыт тэрээһиннэр тустарынан мустубут дьоҥҥо кэпсиэхтэрэ. Манна кыттыыны ылыахтара: Булуҥнааҕы АО “Сахаэнерго”, ОДьКХ, оройуоннааҕы киин балыыһа, улуустааҕы үөрэҕирии уонна ветеринария управлениетын исписэлиистэрэ, үлэһиттэрэ, ону тэҥэ биирдиилээн предпринимателлэр. Хас биирдии тэрилтэ бэрэстэбиитэллэрэ Экология сылын ыытыыга бэйэлэрин кылааттарын туһунан билиһиннэриэхтэрэ. Кэпсэтиигэ Тиксии оскуолаларын үөрэнээччилэрэ кыттыыны ылыахтара.
Иккис блок Ыччат сылыгар ананар. Дакылааты улуус дьаһалтатын ыччат политикатын, спортка уонна туризмҥа отдел салайааччыта Александра Федорова ааҕыа.
Тэрээһини култуурнай-спортивнай комплекс үлэһиттэрэ ырыа, үҥкүү аргыстаах кыра кэнсиэр тэрийэн киэргэтиэхтэрэ.
Иннокентий Стручков:
– Биһиги, айылҕа харыстабылын үлэһиттэрэ, улуус тэрилтэлэриттэн этиилэр киирдэхтэринэ истиэхпит уонна ылынан, быһаарынан ол салаанан үлэлиэхпит. Бу конференцияҕаким баҕалаах кэлэн кыттыыны ылыан сөп.Хайаан даҕаны үөһэ этиллибит тэрилтэлэргэ үлэлиир киһи диэн буолбатах. Ол гынан баран, эрдэттэн конференцияҕа кыттарга киниттэн сайабылыанньа суруйара ирдэнэр.
Харысхан ПОПОВ
Ульяна Попова хаартыскаҕа түһэриитэ