ИДьМ бирииһигэр хапсаҕайга өрөспүүбүлүкэтээҕи аһаҕас турнир

Кулун  тутар  18-19  күннэригэр Дьокуус­кай куорат “Триумф” спорткомплексыгар Саха сирин Ис дьыалатын министиэристи­бэтин бирииһигэр V төгүлүн ыытыллар хапсаҕайга өрөспүүбүлүкэтээҕи аһаҕас турнир  саҕаланна. Турнир үлэ кэмигэр эбээ­һинэстэрин толоро  сылдьан суорума суолламмыт  Ис дьыала сотрудниктарын кэриэстэригэр  ананар, ону таһынан  на­циональнай спорт көрүҥүн уонна чөл олоҕу нэһилиэнньэҕэ киэҥник тарҕатыыга, сайыннарыыга туһуланан ыытыллар.

Турнирга Саха сирин бары улуустарыт­тан полиция отделларын үлэһиттэрэ уонна бу спордунан үлүһүйэн дьарыктанар ааттаах-суоллаах хапсаҕайдьыттар күөн көрсө кэлиэхтэрэ.

Булуҥтан Култуурнай-спортивнай ком­плекс тренердэрэ Жан Самойлов 70 кии­лэлэҕэ уонна Сим Шамаев 62 киилэҕэ хап­саҕайдыахтара. Эбии устудьуон уолат­тар кыт­тыыны ылыахтаахтарын Жан Александрович биллэрэр. Кинилэр кү­рэхтэ­һиигэ кыттыыларын сүрүн сыалы­нан Бүлүү улууһугар ХХ төгү­лүн ыытыл­лар “Манчаары оонньуу­ларыгар” сүү­мэрдиир турнирга бэлэмнэ­нии, санаа бөҕөргөтүнүү уонна көбүөрү кытта билсии буолар. Бэлиэтээн эттэххэ, “Манчаары оонньууларыгар” сүүмэрдиир турнир ку­лун тутар 24 күнүгэр буолара күүтүллэр. Уруккуттан тустубут, хапса­ҕай­даабыт буо­ланнар күрэхтэһиигэ утары­ла­һаач­чы­ларын кытта бэркэ билсэл­лэр эбит. Онон техникаларын, ньымаларын, сөбү­лээн туттар албастарын барытын кэриэтэ билэллэр. “Улахан түһүлгэлэргэ, өрөспүүбүлүкэ та­һымнаах күрэхтэһиилэргэ кытыыны ылбатахпыт ыраатта. Күрэхтэһиилэргэ долгуйуу – киирсэр санааҕын ыһыы буо­лар. Оннооҕор дьон долгуйан, "умайан" хаа­лан, бэйэлэрин билбэт буолуохтарыгар диэри ыһыллар турукка киирэллэр. Пси­хо­логическэй турук күрэхтэһээччи көрдө­рүүтүгэр улахан оруоллаах. Онон бэйэ кутта­ныытын кыайыахха уонна долгуйу­муохха наада”, – диир турнир кыттыылааҕа.

Хапсаҕайга өрөспүүбүлүкэтээҕи аһаҕас турнирга кыттан баран, сарсыҥҥы кү­нүгэр, о.э. кулун тутар 19 күнүгэр, Жан Самойлов уонна Сим Шамаев “Та­баһыттар оонньууларыгар” кыттыыны ылал­ларын туһунан этэллэр. Итини этэр буоллахтара улуустарыгар сүрэхтиин-быардыын ыал­дьар, бэриниилээх дьон диэн. Ол курдук, “Табаһыттар оонньуу­ларыгар” спортсмен уолаттар наартаҕа ойуохтара уонна маамыкта быраҕыахтара. Ону таһынан, “Хотугу тустуу” диэн аат­таах күрэххэ хамаандаҕа очу­куо ылар иһин инники кирбиэҥҥэ таһаарарга туох-баар күүстэрин-уохтарын ууран туран киир­сиэхтэрэ.

Санатан этэххэ, Дьокуускайга ааспыт нэ­диэлэҕэ хотугу многоборье күрэҕэ буо­лан ааспыта. Кинилэр манна хас да сыл бэлэмнээх, өрөспүүбүлүкэ бастыҥнарын, маастардарын кытта тэҥҥэ киирсибиттэрэ истэргэ да астык. Бу күрэххэ уолаттар миэс­тэлэспэтэллэр да, санааларын түһэр­бэк­кэ өссө күүскэ утумнаахтык дьарыкта­ныахпыт диэн этэллэр.

Спортка кыайыы куруук баар буолбат. Хаһан баҕарар буоларын курдук, туохха барытыгар кыайтарыы диэн баарын ум­нумуохха наада. “Киһи бэйэтин сыыһа­ларыгар үөрэнэр” диэн өс хоһооно баар, онон оҥорбут сыыһаларын көннөрөн аны­гыскы күрэхтэһиилэргэ үчүгэй түмүгү көрдөрүөхтэрэ диэн бигэ эрэнэбит.

Харысхан ПОПОВ

Жан Самойлов хаартыскаҕа түһэриилэрэ