Кини – норуот киэҥ туттар киһитэ
Саха сиригэр бу күннэргэ А.Е. Кулаковскай-Өксөкүлээх Өлөксөй 140 сааһыгар анаан араас хабааннаах тэрээһиннэр буолан аастылар. Билэрбит курдук А.Е. Кулаковскай саха литературатын төрүттэспит дьонтон биирдэстэринэн, ону таһынан аатырбыт айанньытынан буолар. Кини уопсайа 108 160 биэрэстэ айаннаабыта биллэр.
Булуҥ библиотекатын ааҕар саалатыгар кылаабынай библиотекэр Людмила Корякина уонна инбэлииттэр сэбиэттэрин бэрэссэдээтэлэ Надежда Апросимова Арктика гимназиятын 9 кылааһын үөрэнээччилэригэр Өксөкүлээх Өлөксөй күнүгэр аналлаах библиотека уруогун ыыттылар.
Людмила Михайловна оҕолорго А.Е. Кулаковскай олоҕун, айар үлэтин туһунан презентация көрдөрөн кэпсээтэ. Өйдөрүн тутан эрэр оҕолор, улуу киһи туһунан тугу саҥаны билбиттэрин-көрбүттэрин эттилэр уонна ырыттылар.
Бу кэнниттэн, сынньана таарыйа “Өйдөөх уонна билэргэ баҕалаах” диэн ааттаах оонньуу буолла.Бэриллибит ыйытыкка кыттааччы быраабыла быһыытынан үс буукуба этэн баран, тылы толору ааттыахтаах. Боппуруостарга үөрэнээччилэр бэрт көхтөөхтүк уонна сэргэхтик эппиэттээтилэр. Ол курдук, элбэх кинигэни таптаан ааҕааччылар ыарырҕаппакка, сөптөөх хоруйдары этэн түргэнник таайдылар. “Буолан ааспыт оонньуу инники олоххутугар туһалаах буолуо”, – диэн библиотека үлэһитэ эттэ.
Бу кэннэ кылаабынай библиотекар эбээһинэһин толорооччу Евгений Матвеев оҕолорго Аан дойдутааҕы атыылаһааччы быраабын көмүскэлин күнүн туһунан кылгастык кэпсээн билиһиннэрдэ.
Онтон улуус музейын дьиэтигэр кулун тутар 17 күнүгэр музей уонна библиотека үлэһиттэрэ Тиксии дьонугар Алексей Елисеевич Кулаковскай төрөөбүтэ 140 сылыгар анаан култуурнай тэрээһини ыыттылар.
Тэрээһини музей дириэктэрэ, кырдьаҕастар Сэбиэттэрин бэрэссэдээтэлэ Марфа Булунская ыалдьыттарга ыраастаныы сиэринэн-туомунан арыйда. Кэлбит дьоҥҥо алаадьы амсаттылар уонна уохтаах кымыһы айах туттулар.
Наташа Данилова хомуска оонньоон иһитиннэрдэ. Библиотека внестационарнай салаатын кылаабынай библиотекара Вуталина Стручкова Өксөкүлээх Өлөксөй туһунан кылгас иһитиннэрии оҥордо. Кини суруйааччы “Хомус” диэн хоһооно Аан дойдуга биэс тылынан тылбаастанан бэчээккэ тахсыбытын бэлиэтээн эттэ. Ону таһынан Вуталина Васильевна мустубут дьоҥҥо А.Е. Кулаковскай уонна да атын суруйааччылар тустарынан викторина күрэҕин ыытта. Толору эппиэт биэрбит кыттааччыларга өйдөбүнньүк халандаар бэлэх туттартаатылар.
Арктика гимназиятын үөрэнээччилэрэ: Ира, Артур Еремеевтар, Лена Назаренко уонна Николь Филиппова “Хомус” диэн хоһоону дорҕоонноохтук ааҕан иһитиннэрдилэр. Оттон ведущай библиотекар Елена Стручкова дойдубутугар саас кэлбитин биллэрэн, айылҕа уһуктуутун туһунан хомуска араас тыастары таһааран оонньоон дьүрүһүттэ. Манна тыалы тыал диэбэккэ кэлбит ытык кырдьаҕас Константин Аммосов ыалдьыттарга байаан доҕуһуолунан ырыа бэлэх уунна.
Кэлбит ыалдьыттар эдэр саастарын санаан, байаанынан хас да ырыаны толордулар.
Бу күҥҥэ ким да туора турбакка, бары ырыа ыллаан, сынньанан дуоһуйан тарҕастылар.
Харысхан ПОПОВ
Ааптар хаартыскаҕа түһэриилэрэр