Оҕолор бырааптарын кыра эрдэхтэриттэн билиэхтээхтэр
Кулун тутар 23 күнэ – Быраабы билии күнэ. Бэлиэ күн чэрчитинэн араас хабааннаах тэрээһиннэр бүтүн Саха сирин үрдүнэн ыытыллаллар. Дойду бары нэһилиэнньэтин араҥатыгар юридическэй көмөнү тустаах исписэлиистэр оҥоруохтара.Ол курдук, үөрэх кыһатын бары тэрилтэлэригэр быраабы билиигэ тустаах көрсүһүүлэр, төгүрүк остуоллар уонна да элбэх араас формааттаах тэрээһиннэр ыытыллыахтара.
Санатан эттэххэ, бу бэлиэ күнү өрөспүүбүлүкэбит бэрэсидьиэнэ алтынньы 5 күнүгэр 2010 сыллаахха 284 №-дээх ыйааҕынан Е.А. Борисов олохтообута.
Булуҥ улууһа бэлиэ күнтэн туора туран хаалбат. Ол курдук, улуус дьаһалтатын дьиэтигэр төрөппүттэри уонна кинилэр оҕолорун "Аһаҕас аан күннэригэр" күүтэллэр. Тоҕоостоох күннэри мүлчү туппакка, дьон идэлээх специалистартан интэриэһэргиир боппуруостарын ыйытыахтара. Сүбэ-ама ылар кыах кулун тутар 27 күнүгэр диэри буолуо.
Тиксии 1, 2 №-дээх оскуолаларыгар, Арктика гимназиятыгар бүгүн, о.э. кулун тутар 23 күнүгэр, кылаас чаастара, төгүрүк остуоллар, бэсиэдэлэр, лекциялар, викториналар ыытыллыахтара.
Сокуоннай саастарын туола илик оҕолор дьыалаларын уонна кинилэр бырааптарын көмүскүүр хамыыһыйа эппиэтинэстээх сэкэрэтээрэ Светлана Колчанова, "Аһаҕас аан күннэригэр" кэлиэхтээх оҕолорго уонна лицей устудьуоннарыгар анаан, бэрт интэриэһинэй араас слаайдардаах "Мои права и обязанности" презентацияны бэлэмнээбитин иһитиннэрэр.
Дьиэ кэргэҥҥэ уонна оҕоҕо көмөлөһүү киинин үлэһиттэрэ Тиксиитээҕи маҥнайгы нүөмэрдээх оскуола улахан кылааһын үөрэнээччилэригэр “Детям о праве” диэн тиэмэҕэ семинар тэрийиэхтэрэ. Биллэрин курдук, манна сүрүн кэпсэтии оҕо быраабын туһунан буолуо. Ону тэҥэ, тэрилтэ психолога оҕолорго киһи бэйэтин быраабын билэригэр сыаллаах “Поверь в себя” диэн уруок ыытыаҕа уонна киэһээҥҥи өттүгэр тустаах үлэһиттэр төрөппүт мунньаҕар оҕо быраабын туһунан кэпсиэхтэрэ.
Арктика гимназията «Быраабы билии күнүн» кулун тутар 22 күнүттэн саҕалаан бэлиэтээтэ. Бу күн гимназия үөрэнээччилэригэр анаан улуус сокуоннай саастарын ситэ илик оҕолор дьыалаларынан дьарыктанар инспиэктэр, опека уонна попечительство исписэлииһэ, үөрэх салалтатын психолога састааптаах бөлөх кэлэн, бэрт киэҥ тиэмэни хабар сүбэ-ама биэрдилэр.
Ону таһынан үөрэх салалтатын специалистара учуокка турар ыалларынан рейдэлиэхтэрэ, хас биирдии дьиэ кэргэҥҥэ бэсиэдэ ыытыахтара.
"Дьиэ кэргэҥҥэ уонна оҕоҕо көмөлөһүү киинин дьиэтигэр оҕолор правовой тест толоруохтара. Ыытыллар тэрээһиннэр улахан таһымҥа ааһалларыгар үөрэх салалтатын специалистара үлэлэһэ сылдьаллар. Ону таһынан, бүгүн биһиги сэттэ үөрэнээччибит быраапка сыһыаннаах өрөспүүбүлүкэтээҕи олимпиадаҕа кытынна. Санатан этэр буоллахха, маннык мероприятиелэр улууска тустаах ыйаах тахсыаҕыттан, 2010 сылтан, сылын аайы ыытыллаллар", – диэн Светлана Колчанова кэпсиир.
Тэрээһиннэр оҕо быраабын, олорор сирин сокуонун биллин уонна убаастаатын диэн сыаллаах бараллар. Сокуону билии кыра оҕо эрдэхтэн саҕаланыахтаах.
Харысхан ПОПОВ