Хапсаҕай халбар хамсаныыларын көрдөрдүлэр
Ааспыт нэдиэлэ бүтүүтэ ИДьМ бирииһигэр өрөспүүбүлүкэтээҕи аһаҕас хапсаҕай күрэҕэ буолан ааспыта. Манна Булуҥ улууһуттан эдэрдэри таһынан бэтэрээн хапсаҕыйдьыттар кыттыыны ылан, бэртээхэй хапсаҕайы көрдөрбүттэрэ. Тахсан эрэр эдэр көлүөнэ спортсменнарыгар Саха сирин уопуттаах бэтэрээн дьоно хапсаҕай кистэлэҥнэрин көрдөрөн, холобур буолаллар. Ол да иһин этэн эрдэхтэрэ “Кырдьаҕастан сүбэтин, эдэртэн эрчимин ыл” диэн.
Аҕыйах сыллааҕыта сахалар төрүт оонньууларбытын кыранан умна сыспыппыт диэтэхпинэ сыыспатым буолуо. Ил Түмэн депутата, хапсаҕай федерациятын бэрэсидьиэнэ Николай Румянцев уонна да атын спорт хайысхатыгар үлэлиир дьон хапсаҕай күрэхтэрин тэрийэн, бу спорт көрүҥүн өрө анньан таһаардылар. Ол түмүгүнэн буолар, сылга хас даҕаны улахан күрэхтэһиилэри тэрийэллэрэ. Хапсаҕай ааттаахтара дьон мустан, күүстэрин, сымсаларын холонор күрэхтэринэн “Хаҥалас хапсаҕайа” биирдэстэринэн ааттанар.
Буолан ааспыт хапсаҕай күрэҕин көбүөрүгэр Булуҥ улууһун Бороҕонугар төрөөбүт-үөскээбит, билигин киин куоракка үлэлии-хамсыы сылдьар Егор Винокуров уонна Кирилл Афанасьев киирсибиттэрэ.
Егор Винокуров эдэр сааһыгар араас таһымнаах күрэхтэһиилэргэ кыра кыралаан киирсэр эбит. Кэлин бэтэрээннэр ахсааннарыгар киирэн баран, бу көрүҥүнэн утумнаахтык дьарыктанан саҕалаабыт. Элбэхтэ эрчиллэрэ таайан, утарсааччыларын быраҕаттаан, кыайыы үрдүк үктэллэрин дабайбытынан барбыт. Кини Николай Румянцев бирииһигэр, “Хаҥалас хапсаҕайыгар”, “Бөҕө Тарахай” курдук улахан таһымҥа ыытыллар күрэхтэргэ үс иһиттэн түспэт. ИДьМ бирииһигэр V төгүлүн ыытыллыбыт аһаҕас күрэххэ Егор Винокуров 80 киилэлээх хапсаҕайдьыттарга уон аҕыс маастар нуорматын толорбут дьону кыайталаан, бочуоттаах үһүс миэстэҕэ тахсыбыт.
Онтон Кирилл Афанасьев 60 киилэлээхтэргэ үһүс миэстэ иһин киирсиигэ бэрт кыһыылаахтык көбүөрү таарыйан, хотторуу хомолтотун билбит. Спорт аата спорт. Бэлиэтээн эттэххэ, Кирилл Васильевич хапсаҕайга доҕорун курдук эмиэ бочуоттаах миэстэлэртэн түспэт бөҕөс. Ол туоһутунан “Хаҥалас хапсаҕайыгар” сымсатык киирсэн, бочуоттаах иккис миэстэҕэ тиксибитэ буолар.
“ИДьМ бирииһигэр ыытыллыбыт хапсаҕайга хаһыс да кыттааһыным. Хапсаҕай диэн утарылаһааччыгыттан бэрт кыратык болҕомтоҕун араардыҥ да, быраҕыллыбыккын өйдөөбөккө да хааларыҥ буолар. Ону таһынан хапсаҕайга сэрэбиэй түмүгэ улахан тутулуктаах, холобура, сэрэбиэйгэр уопуттаах дьон түбэстэҕинэ, күүскүн-уоххун барыырыҥ дьэ кэлэр буоллаҕа. Тус бэйэм маастар нуорматын толоро иликпин, быйыл дьэ ыларым буолуо. Оо, эдэр сылдьаммын долгуйан салыбырыыр да этим, онно тэҥнээтэххэ билигин бэйэбин хонтуруоллуубун. Аны бары күүһү кулун тутар 24 күнүттэн саҕаланар “Манчаары оонньууларыгар” сүүмэрдиир турнирга уурабыт. “Манчаары оонньууларыгар” хаһан да кыттан көрө иликпин, дойдум аатыттан бу аан маҥнайгыбын кыттаары, сүүмэрдиир турнирга киирсэбин”, – диэн Егор Егорович кэпсиир.
Эбэн эттэххэ, бу нэдиэлэҕэ буолуохтаах күрэхтэһиигэ Булуҥтан ааттаах-суоллаах хапсаҕайдьыттар Хара-Уулаах баһылыга Гаврил Попов уонна баһаарынай чаас суоппара Влад Филиппов айанныахтара.
Харысхан ПОПОВ
Егор Винокуров хаартыскалара