Олег Тарасов бэлэхтээбит былассаакката олоххо киирдэ
Сылаас сааскы кэмнэр кэлбиттэринэн оҕолорго уонна олохтоохторго анаан хотуок арылынна. Санатар эбит буоллахха, былырыын күһүн «Якутскэнерго” генеральнай дириэктэрэ Олег Тарасов Булуҥ улууһугар кэлэ сылдьан, Тиксии оҕолоругар анаан хоккейынан дьарыктанар былассаакка бэлэх оҥорон барбыта. Эрдэ бөһүөлэк олохтоохторо үтүө дьыалаттан туора турбакка Булуҥнааҕы “Сахаэнерго” үлэһиттэрин кытта былассаакканы туруоран бэлэмнээбиттэрин кэннэ баһаарынай чаас сотрудниктара уу куппуттара.
Ол курдук, кулун тутар 24 күнүгэр Тиксии дьаһалтатын дьиэтин утары баар хаҥкылыыр сири Александр Казаков салайаачччылаах“Сахаэнерго” үлэһиттэрэ муус хаарын кылбаччы ыраастаан кэбистилэр. Үлэ күргүөмнээхтик түүн 3 ч диэри салҕаммытын истибиппит.
Сарсыҥҥы күнүгэр хаҥкылыы кэлбит дьон санааларын маннык үллэстэллэр.
Алексей Якименко: «По моему мнению, чтобы сделать хоккейный каток нужно собираться всем населением, а не только составом работников «Сахаэнерго». 17 марта весь инженерный состав во главе с главным инженером и директором Александром Казаковым вышел и закончил работу над катком в 3 часа ночи. Доволен, что у нас в поселке появился свой собственный каток для наших детей. Я увлекаюсь не только коньками, но и также катаюсь на лыжах, а когда есть время играю и в волейбол».
Анастасия Стручкова: «Биһиги дьиэ кэргэн бөһүөлэк оҕолоругар анал хотуок оҥорбуттарыгар наһаа үөрдүбүт. Дьиэбит хотуоктуур сиртэн чугас турар, онон билэ-көрө олорор буоламмыт оҕобут хаҥкылыыр сир оҥоһуллан бэлэм буолбутун кэннэ, хара сарсыардаттан манна хаҥкылыы кэлиэн баҕарар баҕата улахан этэ. Хаҥкы өттүгэр кыһалҕа көрсүбэтэхпит, эрдэттэн Дьокуускайтан сакаастаан аҕалтарбыппыт. Билигин бачча үчүгэй сааскы күннэри көтүтэр санаабыт суох. Күн ахсын кэлиэхпит”.
Ольга Матвеева: «Оҕолорбут өр күүппүт ыра санаалара дьэ туолла. Холобура, дьыссаакка сарсыарда туралларыгар ыарырҕатар эбит буоллахтарына, омуннаабакка эттэххэ билигин кинилэр сарсыарда 5 чааска туран хаҥкылыы бараары тиэтэйэллэр. Оҕом эрдэттэн роликка турар буолан, хаҥкыга турарга ыарахаттары көрсүбэтэҕэ. Бу күннэргэ кыыспытыгар хаҥкы сакаастыыр былааннаах сылдьабыт. Олег Тарасовка үтүө дьыалатын иһин, оҕолорбутугар бачча үчүгэй хаҥкылыыр сир бэлэх оҥорбутугар уонна хотуок олоххо киирэригэр күүс-көмө бэйэлэрин кылааттарын киллэрбит дьоҥҥо улахан махталбын тиэрдэбин”.
Мээнэ уулуссаны кээмэйдиэхтээҕэр оҕолор, эдэр ыччат катокка тиийэн хаҥкыга туран чөл олоххо сыстан, спордунан дьарыктанан, хатааһылаабыттара уонна оонньообуттара туохтааҕар да ордук. Кэнники кэмҥэ оҕо былассааккалара элбээбиттэрэ киһини үөрдэр. Оҕолор түмсэн онно-манна мээнэ сылдьыбакка футбооллуу, хоккейдыы, хаҥкылыы сылдьалларын көрөрбүт үксээтэ. Оҕо иллэҥ кэмигэр туох эмэ интириэстээх эрэ буоллаҕына куһаҕан дьаллыкка ылларбата чахчы. Эдэр ыччат билиҥҥи кэмҥэ чөл олохтоох эрэ киһи обществоҕа наадалаах, туһалаах буоларын дьэ өйдөөтө. Кинилэр кыра оҕолорго холобур буолаллара турдаҕа.
Харысхан ПОПОВ
Ааптар хаартыскаҕа түһэриилэрэ