Аҕа уонна уол “Дьоһун солбук” күрэххэ төһө бэлэмнээхтэрин көрдөрдүлэр

Бу өрөбүллэргэ, ол эбэтэр, муус устар 1 күнүгэр Өрөспүүбүлүкэтээҕи Аҕа күнүн чэрчитинэн  Тиксии Култуурнай-спортивнай комплекс спортивнай  саа­латыгар аҕаларга уонна уолаттарга аналлаах “Дьоһун солбук” диэн ааттаах-суоллаах спортивнай күрэх буолан ааста.

Тэрээһиҥҥэ биэс аҕа уолаттарынаан уонна бырааттарынаан бастыыр иһин күөн көрүстүлэр. Күрэх сэттэ түһүмэхтэн турда: аҕаларга АК-47 аптамаат ыһыыта, таҥыыта; 24 киилэлээх гиирэ көтөҕүүтэ; уолаттарга тардыныы көрүҥэ; бэһиэлэй түһүмэхтэрдээх эстафета; түргэнник сал­лаат хааһытын аһааһын; “Көмүс илии” диэн ааттаах түргэн туттунуулаах таҥас тигиитэ уонна бүтэһик түһүмэҕинэн канаат тардыһыыта буолла.

Тэрээһини Арктикатааҕы гимназия үһүс кылааһын үөрэнээччилэрэ ырыанан  ас­тылар. Бастакы түһүмэххэ, АК-47 аптамаат ыһыытыгар уонна таҥыытыгар, аҕалар бары  үчүгэй бириэмэни көрдөрбүттэрэ, кыттааччылартан ким даҕаны уһуннук бадьыыстаспатаҕа.

24 киилэлээх гиирэни көтөҕөн,  төрөп­пүттэр оҕолоругар холобур буолан, күүс­тээхтэрин-уохтаахтарын көрдөрдүлэр.

Тардыныы этааба. Кыра уолаттар бэйэ­лэрин төһө кыаналларын дьэ ман­на көрдөрүлэр. Бу көрүҥҥэ бэрт үчүгэй техни­кэлээхтик тардынарын көрдөрөн, утар­сааччыларын лаппа ырааҕынан хаалларан Мезенин Дмитрий кыайыылааҕынан та­ҕыста.

Ханна да буоларын курдук, күрэхтэһии саамай бэһиэлэй көрүҥэ эстафета буо­лар. Манна хамаандалар үчүгэй хартыыналары көрдөрбүттэрэ.

“Дьоһун солбук” саамай интэриэһинэй уонна көрдөөх түһүмэхтэринэн  буоллулар бириэмэҕэ саллаат хааһытын аһааһын уонна таҥас тигиигэ “Көмүс илии”. Дьэ манна көрдөрбүттэрэ хамаандалар түргэн тут­тунуулаахтарын.

Тэрээһини дьону умсугутан тардар, ыһыылаахтык-хаһыылаахтык барар канаат тардыһыыта буолла.

Кэлээччи дьон мантан туора турбакка, бэйэлэрин хамаандаларыгар ыалдьан, саала толору буоларын, баарын биллэрбитэ.

Күрэхтэһии быыһыгар Тиксиитээҕи маҥ­найгы нүөмэрдээх оскуола иккис кылааһын оҕолоро ырыанан, кыргыттар үҥ­күүнэн дьон биһирэбилин ылан, сэр­гэхситтилэр.

Түмүккэ үһүс бочуоттаах миэстэни Василий Попов быраатынаан Корякин Егор­дуун ылла, иккис бириистээх миэс­тэҕэ Корякин Егор быраатынаан Дмитрий Ни­китинниин таҕыстылар уонна ыытыллыбыт тэрээһин муҥутуур кыайыылаахтарынан Александр Мырсанов быраатын Мезенин Дмитрийдыын ааттаннылар.

Кыттыыны ылбыт бары хамаандалар сыаналаах бириистэринэн, грамоталары­нан наҕараадаланнылар.

Сыл аайы үгэс буолбут күрэхтэһиигэ Василий Попов бу да сырыыга бириистээх миэстэттэн түспэтэ. Кини тэрээһин би­риистэрэ сылтан сыл тупсан иһэрин этэр уонна өссө да кыттыыны ылыам диэн баҕа санаатын үллэстэр.

Кыра уолаттарга күрэх байыаннайдыы этааптара инники олохторугар туһалыа диэн эрэнэбин, инникитин кинилэр эр дьон ааттаахтара, дьиэ кэргэн аҕа баһылыктара, өһүллүбэт тутаахтара буолуохтара турдаҕа.

Харысхан ПОПОВ