Булуҥ олохтоохторо буолбут алдьархай хомолтотун тэҥҥэ үллэстэллэр
Нэдиэлэ саҕаланыыта Дойдубут Санкт-Петербург куоратыгар киһи өйүгэр сатаан баппат дьулаан быһылаан буолла. Ол курдук, муус устар 3 күнүгэр петербургтааҕы метро “Сенная площадь” уонна “Технологический институт-2” станциялар икки ардыларыгар дэлби тэбии алдьархайа буолбута. Өссө биир дэлби тэбии “Площадь Восстания” станцияҕа буолуохтааҕын тустаах үлэһиттэр түргэн туттунууларын көмөтүнэн, эрдэттэн тохтоппуттар. Иһитиннэрии баарынан, теракт кэмигэр эмсэҕэлээбиттэр быыстарыгар Саха сирин олохтооҕо эмиэ баар. Уһун унньуктаах эпэрээссийэ кэнниттэн кини доруобуйатын туруга бэттэх кэлбит. Саха сирин толорор уорганнара эмсэҕэлээбит Дьокуускай куорат олохтооҕор материалнай көмө көрүллүө диэн эрэннэрбиттэр. Билигин терагы оҥорбуттары көрдүү сылдьаллар.
Быһылаан кэннэ Эмиэрикэ холбоһуктаах штаттарын уонна Арассыыйа бэрэсидьиэннэрэ телефон нөҥүө кэпсэтиилэрин түмүгүнэн, сир үрдүгэр икки модун дойду терагы утары биир сомоҕо буолан бары күүстэрин холбуохтара, ууруохтара. Дональд Трамп Арассыыйа норуотугар дириҥ кутурҕанын тиэрдибит.
Санкт-Петербург олохтоохторугар 3 күннээх траур биллэриллибитэ. Саха сирэ Санкт-Петербург олохтоохторун, бүтүн Арассыыйа дьонун өйөөн, ыар кэмҥэ туора турбакка, муус устар 4 күнүгэр кутурҕан чааһын тэрийдэ. Кыайыы боллуоссатыгар, Ленинград куорат-герой обелиһыгар Ил Дархан Егор Борисов Дьокуускай куорат олохтоохторун кытта Санкт-Петербург куоракка теракт түмүгэр суорума суолламмыт дьон кэриэһигэр сибэкки дьөрбөтүн уурда, чүмэчи уматта.
Егор Афанасьевич мустубут дьоҥҥо өрөспүүбүлүкэ бырабыыталыстыбата метроҕа эстии быһылааныгар түбэспит Петербург олохтоохторугар уонна, бастатан туран, манна эчэйии ылбыт биир дойдулаахтарбытыгар көмө оҥоһуллуо диэн иһитиннэрбит. “Бу биһиги бары алдьархайбыт. Маннык сиэргэ баппат дэлби тэбии ыар буруйун оҥоруута киһи өйүгэр хайдах да батан киирбэт. Маны билиҥҥи эдэр ыччат өйдүөн уонна хаһан даҕаны маннык провокацияҕа кииримиэн наада”, – диэн Ил Дархан бэлиэтээн эппит.
Егор Афанасьевич Дьокуускай куорат олохтоохторугар уонна ыалдьыттарыгар, чуолаан эдэр ыччакка, хомолтолорун үллэстэ, буолбут иэдээнтэн туора турбакка кутурҕан тэрээһиҥҥэ кэлбиттэригэр махталын биллэрбит.
Буолбут теракт бука, хас биирдии киһини хомоппут буолуохтаах. Тиксиигэ таҥара дьиэтигэр Дионисий аҕабыыт сулууспа ыытан, быһылааҥҥа суох буолбут уонна эчэйбит дьон туһунан саныылларын этэр. «Тиксиитээҕи Серафимо-Никольскай таҥара дьиэтэ Дойдуну кытта бииргэ курутуйар. Алдьархайга эмсэҕэлээбиттэргэ үтүөрэллэригэр баҕарабын, чугас дьоннорун сүтэрбиттэргэ – дириҥ кутурҕаммын тиэрдэбин. Терактар Аан дойду үрдүнэн буолбаттарын туһугар таҥара сулууспатын кэмигэр үҥэбит уонна алдьархай өлүүтүгэр түбэспит дьоммутун-сэргэбитин хайаан даҕаны саныыбыт», – диир аҕабыыт.
Харысхан ПОПОВ