Олорор сирбит ыраас буолуутун туһунан хамыыһыйа мунньах ыытта
Саха сирин Бырабыыталыстыбатын 2016 с. кулун тутар 24 күнүттэн 270 №-дээх дьаһалынан өрөспүүбүлүкэ киин уонна хоту сытар улуустарыгар кулун тутар 28 күнүттэн ыам ыйын 28 күнүгэр диэри, онтон Арктика оройуоннарыгар – муус устар 25-тэн бэс ыйын 25 күнүгэр диэри икки ыйдаах санитарнай ыраастааһын күннэрэ биллэриллибиттэрэ.
Икки ыйдаах санитарнай ыраастааһын чэрчитинэн Булуҥнааҕы анал эпидемияны утарар санитарнай хамыыһыйа муус устар алтыс күнүгэр улуус дьаһалтатын дьиэтигэр сүбэ мунньах тэрийдэ. Бу мунньаҕы иилээн-саҕалаан хамыыһыйа бэрэссэдээтэлэ, улуус баһылыга Игорь Кудряшов ыытта, кыттыыны ыллылар Тиксии бөһүөлэгин баһылыга Вячеслав Усачев уонна улуус тэрилтэлэрин бэрэстэбиитэллэрэ.
ОДьКХ Булуҥнааҕы салаатын дириэктэри солбуйааччы Дмитрий Накул иһитиннэриитинэн, Тиксии уонна Тиксии-3 бөһүөлэктэр элбэх этээстээх дьиэлэригэр билиҥҥи туругунан 18 киһи үлэлиир. Бу дьоннор күҥҥэ икки бөһүөлэк элбэх этээстээх дьиэлэрин сатаан баттаһа хомуйбаттарын этэр, кинилэр үлэлэригэр дьиэ таһын биэс миэтирэлээх ыраастааһын эрэ буолбакка ис хомуйааһын эмиэ киирэрин чопчулуур.
Мунньахтааччылар этэллэринэн, Тиксиигэ саамай кыһалҕалаах Морской 42 №-дээх уонна Гагарина уулуссаларга баар дьиэлэр буолаллар. Ону таһынан, бөһүөлэкпит киин уулуссаларын дьиэлэрэ, суоллара бу сылга элбэх хаардаах, буурҕалаах кыһын буолбутунан сибээстээн бүтүннүү хаарынан күүскэ бүрүллүбүттэр. Сорох сиргэ ыраастыырга аналлаах улахан тиэхиникэлэр киирэллэригэр контейнердар улахан мэһэй буолаллара эмиэ ахтылынна. Мунньах кыттыылаахтара бу кыһалҕаны инникитин хайдах ылынан үлэлииллэрин сүбэлэстилэр. Үлэ олох барбат буолбатах, төһөтүн да иһин, ыраастааһын үлэтэ барбытын үрдүнэн, сөпсөспөт, син биир хом санаалаах дьон ханна барыай. Кинилэр санаалара салайааччыларга киирэр, иһиллэр. Айылҕа бэйэтэ буурҕа, тыал, хаар түһэрэрин хайдах гыныаххыный. Бары бэйэ-бэйэбитин өйдөһөн-өйөһөн, убаастабыллаахтык сыһыаннаһыахха.
Вячеслав Усачев иһитиннэриитинэн, билиҥҥи туругунан икки үлэһит тэлиэгэлэри соһо сылдьан, дьон халтарыйбатын диэн бөһүөлэги биир гына кумах куталлар, подъезтарга киириигэ кытары. Ол курдук, кинилэр сотору кэмҥэ Академик Федоров аатынан уулуссаҕа кумах кутуохтара.
“Восход” ХЭТ Тиксии бөһүөлэгин эрэ буолбакка, улуус айан суолун барытын оҥоро сатыырын бэлиэтиир тоҕоостоох. Ол курдук, бу тэрилтэ үлэһиттэрэ билигин Бороҕон нэһилиэгин Тиксии бөһүөлэгин кытта ситимин быспатын туһугар үлэлии сылдьалларын Михаил Шаруненко иһитиннэрдэ. Кини этэринэн, билиҥҥи күҥҥэ “Восход” тэрилтэ бары тиэхиникэтэ Бороҕон-Тиксии суолун оҥорууга сүрүн күүһэ быраҕыллыбыт.
Сүбэ мунньах кэнниттэн кэпсэтиигэ кэлэн кыттыспыт дьон, улуустааҕы тэрилтэлэлэр бэрэстэбиитэллэрэ биир сомоҕо буолан түмсэн, биир санааҕа кэлэн, дьон кыһалҕатын өйдөөн, үлэлэһиэх буолан сөбүлэстилэр. Норуот манна эмиэ барытын былааска сэлээннээбэккэ утары кэлиэхтээх. Хаһыат аныгыскы нүөмэригэр хамыыһыйа быһаарыныытын кытта билсиэххит.
Харысхан ПОПОВ