Талыллыбыт оҥоһуктар “Хотугу кустук” күрэххэ кыттыахтара

Тиксиигэ бу күннэргэ Арктикатааҕы гимназияҕа оскуола оҕолорун оҥоһук­тарынан улуус таһымнаах быыстапка-куонкурус  буола турар. Тэрээһини Булуҥнааҕы оскуола таһынан оҕолору уһуйар киин иилээн-саҕалаан ыытар. Быыстапка сааскы сынньалаҥҥа сөп түбэһиннэрэн, кулун тутар 25 күнүттэн  муус устар 15-гэр диэри,  талааннаах оҕолору өйүүр сыаллаах ыытыллар.

“Маннык тэрээһин сылын аайы ыытыллар. Быйыл куонкуруска  сэттэ ос­куола уонна оскуола таһынан оҕо­лору уһуйар киин иитиллээччилэрэ бэйэ­лэ­рин үлэлэрин аҕалан, дьон көрүү­түгэр таһаардылар. Төрүт үгэскэ ытык­табыллаахтык сыһыаннаһыыга, оҕолор төрөөбүт дойдуларын таптаатыннар, убаастаатыннар диэн соруктаах тэри­йэбит”, – диэтэ Киин  методиһа Алена Шумилова.

Сылтан сыл аайы быыстапка сайда-кэҥии турар, саҥа сүүрээннэр киирэллэр, оҕолор оҥоһуктара тупсар.Быыкаптааҕы орто оскуола үөрэнээччилэрэ быйыл пластилинынан живопись хартыыналарын быыстапкаҕа туруоран, дьон биһирэбилин ыллылар. Ону таһынан бу оскуола үөрэнээччилэрэ уруккуттан  маһынан үлэлиир дьоҕурдаахтарынан биллэллэр. Бу да сырыыга кинилэр остуолларын уустуктук оҥоһуллубут, кыһыллыбыт араас мас оҥоһуктар киэргэттилэр. Тиксии маҥнайгы нүөмэрдээх оскуолата кумааҕынан ордук сөбүлээн үлэлиирин көрдөрдө. Ол курдук, бу оскуола оҕолоро, кэнники кэмҥэ аан дойду үрдүнэн улахан биһирэбили ылбыт уруһуй искусствотын саҥа сүүрээнин – кумааҕы пластикатын бэркэ баһылаабыттарын бэлиэтиибит.

Уопсайынан быыстапкаҕа турбут оҥо­һуктарынан көрдөххө, оҕолор бары уруһуйга сатабыллаахтара көстөр. Манна акварелтан, арыылаах кырааскаттан, миэл­тэн саҕалаан, өстүөкүлэҕэ уруһуй­га тиийэ хартыыналар, сымнаҕас оон­ньуурдар, араас өҥнөөх кумааҕы бытар­хайдарынан оҥоһуллубут оҥоһуктар остуолга кэчигирэһэ тураллар. Нэһи­лиэк оскуолаларын оҕолоро  айылҕа матырыйаалларынан  хото туһанналлар эбит. Таймылыыр уонна Хара-Уулаах оскуолалара таба муоһуттан киэргэл­лэри, кыыллары оҥороллор. Холобура, Таймылыыр кыыһа таба муоһугар олоҥ­хоттон  Ньургун Боотуру уруһуйдаабыт.

Оҕолор үлэлэрин интэриэһэргээн үгүс дьон кэлэн көрдө-иһиттэ. Бүтүн кылааһынан кэлэн Арктикатааҕы гимназия уонна Тиксии 1-кы №-дээх оскуолата бииргэ үөрэнэр табаарыстарын  үлэлэрин сэргии көрдүлэр, астынан-дуоһуйан бар­дылар. Инники сылларга доҕотторун үлэлэриттэн санаалара өрө көтөҕүллэн, баҕар бэйэлэрэ талааннара арыллан, быыс­тапкаҕа кыттыахтара.

Киин методиһа Алена Шумилова сыл ахсын тэрээһиҥҥэ кыттааччы ах­саана элбиирин бэлиэтиир. "Быйылгы быыс­тапкаҕа оҕолор элбэх араас көрүҥнэртэн, матырыйааллартан оҥорон таһаа­рыылара үксээбит. Бу барыта оҕо толкуйдуур дьоҕура эбиллибититтэн уонна кэҥээбититтэн көстөр. Үчүгэй үлэлэри талан, ыам ыйын 3, 4 күннэригэр буолаары турар “Хотугу кустук” өрөс­пүүбүлүкэтээҕи быыстапка күрэҕэр кытыннарыахпыт", – диэтэ кини.

Харысхан ПОПОВ

Алена Шумилова хаартыскалара