Саҥа КВН күрэх “Айхалга” сүрэхтэниэ

Улууска үгэс буолбут “Хоту оҕолоро ыллыыллар уонна үҥкүүлүүллэр” фес­тивалга кытта кэлбит оҕолорго анаан муус устар 15 күнүгэр "Айхал" этно­култуурунай кииҥҥэ "Сир олохтоох­торугар – ыраас планетаны" диэн тиэмэлээх КВН күрэҕэ буолаары турар. Бэлиэтээн эттэххэ, күрэх улууска аан маҥнайгытын тэриллэн ыытыллар, экология сылыгар уонна Саха сиригэр оҕолор уопсастыбаннай бөлөхтөрүн хол­боһуга 25 сылын бэлиэтиир үбүлүө­йүгэр ананар.

Тэрээһини Булуҥнааҕы оскуола та­һы­нан оҕолору уһуйар киин оҕолор түм­сүүлэрин кытта үлэлэһэр методист Мария Капитонова улууска көҕүлээбит. Кини КВН-щиктар элбииллэригэр уонна оҕолор олоххо сыһыаннарыгар көмө буоллун диэн сыалтан бу оонньууну тэрийэргэ санаммыт. "Үс хамаанда кыттар баҕа санаалааҕын биллэрдэ. Тиксиитээҕи 1-гы №-дээх ос­куола хамаандата "Умка", Күһүүр орто оскуолатыттан "Мамоннар" уонна Хара-Уулаахтан "Муора оҕолоро" диэн ааттаах хамаандалар. Кинилэр КВН-ҥа бэйэлэрин талааннарын көрдөрүөхтэрэ уонна бас­тыыр иһин киирсиэхтэрэ. Биирдии хамаандаҕа уон кыттааччыттан ордук буолуо суохтаах. Хамаандалар бары олус көхтөөхтөр уонна бэһиэлэйдэр, бары наһаа үчүгэй айымньылаахтар. Онон кинилэр бары сыанаҕа күөн көрсөргө бэлэмнэр. Олох үчүгэйдик, үрдүк та­һымҥа ааһыа дии саныыбын уонна эрэ­нэбин. Атын оскуолалар эһиилги ыытыллар тэрээһиҥҥэ кыттар баҕа са­наалаахтарын иһитиннэрдилэр. Онон КВН үгэскэ кубулуйуо. Сылга иккитэ тэрийэн ыытар баҕа санаалаахпыт: сүлүөт уонна КВН диэн салааларга арахсыа", – диэтэ кини.

КВН үс түһүмэхтээх: бастакы – “Мин эдэрбин”, манна кыттааччылар бэйэлэрин хамаандаларын билиһиннэриэхтэрэ, иккис –“Триатлон”, классическэй разминка уон­на стендап, үһүс –“Музыкальнай дьиэ­тээҕи сорудах” эрдэ  бэлэмнэнэн кэлэн толоруохтара.

Биэс киһи састааптаах дьүүллүүр сүбэ оҕолор нүөмэрдэрин түөрт критерийинэн көрөн сыаналыа. Дьүүллүүр сүбэ састаа­быгар улуус дьаһалтатын дьиэтин сүрүн специалиһа Владимир Милославскай бэрэссэдээтэллээх Александра Федорова, Василий Баланов, Василий Бурцев уон­на Евгения Моисеенко олоруохтара. Олох­тоохтор уонна ыалдьыттар саҥа ыытыллар сонун күрэҕи көрөөччү буолан саа­ланы толоруохтара уонна бэйэлэрин хамаандаларыгар ыалдьа, күүс-көмө буола элбэх оҕо-аймах кэлиэ.

Кыайыылаахтар көһө сылдьар улуус­тааҕы КВН лигатын кубогынан наҕараа­даланыахтара уонна хамаанда саамай бэриниилээх, бэһиэлэй хамандыырыгар "Үчү­гэй хапытаан" номинация үрдүк аатын туттарыахтара.

Харысхан ПОПОВ