Быйылгы Оонньуулар түмүктэрэ
Улууспутугар сыл ахсын ыытыллар "Өбүгэ оонньуулара" уонна "Хотугу оҕолор ыллыыллар уонна үҥкүүлүүллэр" күрэхтэр бу нэдиэлэнэн түмүктэннилэр. Оҕолор кыайыы аргыстаах бэйэлэрин нэһилиэктэригэр айаннаабыттара, онтон үрдүк чыпчаалга бэрт кыра хаамыынан тиийбэтэх хамаандалар бэйэлэрин сыыһаларын көннөрөн, эһиил буолар Оонньууларга өссө ордук бэлэмнээх кэлиэхтэрэ турдаҕа. Онон, эһиил күрэх XXV төгүлүн ыытыллыахтаах үбүлүөйдээх сылыгар үрдүк таһымнаах киирсиилэри эрэнэ күүтэ хаалабыт.
Быйыл XXIV төгүлүн ыытыллыбыт "Өбүгэ оонньууларын" судьуйата, култуурунай-спортивнай комплекс тренерэ Сим Шамаев күрэх туһунан бэйэтин санаатын үллэстэр:
– Быйылгы Оонньуулар олох уратытык аастылар диэн бэлиэтиибин. Холобура, былырыын маамыкта быраҕыы, наартаны ойуу, онтон да атын көрүҥнэр барыта Арктикатааҕы гимназия саалатыгар ааспыттара. Онно саалата кыараҕас буолан, дьон баппат этэ, аҥардас судьуйалар күрэхтэһээччилэри бэрэбиэркэлииллэригэр бэйэ-бэйэлэрин мэһэйдэтэллэрэ уонна ыарырҕаталлара. “Биһиги көрбөппүтүгэр судьуйалар балыйаллар” диир дьон эмиэ аҕыйаҕа суохтара. Эрдэ нэһилиэнньэ бу көрүҥнэри интэриэһиргээбэт эбит буоллаҕына, киэҥ-куоҥ КСК саалатыгар кэлэн, бу спорт көрүҥнэрин сэргээн көрдүлэр. Эбии кэмигэр баттаһа оҕолор түмүктэрин тутатына таһааран истибит, онон улаханнык судьуйалара балыйаллар диэн кэпсэтии суоҕа. Тэрээһин олус үчүгэйдик ааста. Бу икки улахан күрэх бэйэлэригэр олох мэһэйдэспэтилэр, араас күннэргэ аастылар, онон оҕолор төттөрү-таары сүүрэ сылдьыбатылар.
Көрүҥҥэ барытыгар быйыл оҕолор үчүгэй бэлэмнээх кэлбиттэрэ көстөр. Ол курдук, сүгэ быраҕыытыгар Күһүүртэн Бочаров Вася саҥа рекорд олохтууругар олох кыра тиийбэтэ. Хапсаҕайдьыттарга мин бэлиэтии көрөрбүнэн кыра саастаах уолаттар кэнники сылларга үчүгэй хапсыһыылары көрдөрөллөр. Элбэх албастары Таймылыыр кыра хапсаҕайдьыттара көрдөрдүлэр уонна Тиксиитээҕи тустуу секциятын иитиллээччилэрин, Күһүүр хамаандатын уолаттарын бэлиэтиэххэ наада.
Арктикатааҕы гимназия хамаандата былырыын лидердэртэн олох ырааҕынан хаала сылдьыбыт эбит буоллаҕына, быйылгы Оонньууларга баарын биллэрдэ, бары көрүҥнэргэ олох үчүгэй бэлэмнээх буолан, кыайыан кыайда.
Кэлэр Оонньууларга оҕолор өссө үчүгэй бэлэмнээх кэллиннэр, таһаарылаах түмүктэри көрдөрдүннэр, саҥа рекордары туруордуннар диэн, бары хамаандаларга ситиһиилэри баҕарабын. Күһүүр олохтооҕо буоларым быһыытынан, дойдум оҕолоруттан үчүгэй көрдөрүүлэри кэтэһэбин.
Сим Шамаев бэйэтэ эмиэ бу Оонньуулартан куорсун анньынан тахсыбыт киһи буолар. Ол курдук, тренер оскуолаҕа үөрэнэр сылларыгар олох кыра эрдэҕиттэн кыттан саҕалаабыт. Кини бастатан туран хапсаҕайга, маамыкта быраҕыытыгар, наартаны ойууга өрүү кыттар эбит. Сорох ардыгар маска да холонон көрөр кэмнэрэ баар буола сылдьыбыт. “Оччолорго Тиксиигэ күрэхтэһэ эрэ кэлэрбит, мээнэ таптаатахпыт аайы кэлбэт-барбат этибит” диэн этэр.
Харысхан ПОПОВ