Булуҥ ыччата туризм хайысхатын сэҥээрэр
Саха сиригэр Эдэр ыччат сылын чэрчитинэн өрөспүүбүлүкэ ыччатын кэрэҕэ, үчүгэйгэ угуйаары араас таһымнаах тэрээһиннэр улуустарга ыытыллаллар.
Тиксиигэ бу күннэргэ ыччат форума улуус эдэр дьонун муста. Форум муус устар 20-тэн 22 күнүгэр диэри ыытыллар.
Булуҥ улууһун ыччатын форумугар аналлаах “Билиҥҥи ыччат: кыһалҕалар уонна инники кэскил” диэн ааттаах төгүрүк остуол муус устар 20 күнүгэр аан маҥнайгытын ыытылынна.
Тэрээһини улуус баһылыга Игорь Кудряшов истиҥ эҕэрдэ тылынан арыйда. “Санааҕытын аһаҕастык этиҥ. Туох былааннааххытын истэн баран, улуус дьаһалтата сөптөөх быһаарыылары ылыа”, – диэн этиитин түмүктээтэ.
Эдэр ыччат политикатын, спорт уонна туризм салаатын салайааччыта Александра Федорова бу сылга улууска уонна өрөспүүбүлүкэҕэ Эдэр ыччат сылыгар аналлаах туох тэрээһиннэр буолуохтаахтарын иһитиннэрдэ. Кини нэһилиэктэн кэлбит ыалдьыттарга бөһүөлэк ыччата кыһыҥҥы кэмҥэ ханнык спорт көрүҥнэринэн сөбүлээн дьарыктанарын уонна аралдьыйарын сырдатта.
Түмсүүлэр лидердэриттэн Тиксиитээҕи “Сого” ыччат түмсүүтүн чилиэнэ Антон Янцен араас хабааннаах үлэлэргэ көмөлөһөллөрүн, олохтоохторго чөл олоҕу кытта ситимнээх тэрээһиннэри тэрийэллэрин кэпсээтэ уонна инники былааннарын билиһиннэрдэ.
Быыкап "Дельта" диэн ааттаах түмсүү лидерэ Иван Лукашенко ыам ыйыгар “Зарница” оонньуута, үгэс буолбут “Бурааннарынан” куоталаһыы күрэҕэ ыытыллыахтаахтарын эттэ уонна көрө кэлэллэригэр, кыттыыны ылалларыгар ыҥырда. Ол курдук, Быыкапка аан маҥнайгытын ыытыллыбыт "Бакалдын" – күнү көрсүү диэн эбэҥкилэр бырааһынньыктара үрдүк таһымҥа ааспытын бэлиэтиир.
Күһүүртэн кэлбит лидер Александра Корякина ыаллыы сытар Сииктээх нэһилиэгин ыччатын кытта спортивнай оонньуулары тэрийэллэрин эттэ. Кини слайд көмөтүнэн нэһилиэктэрин ыччатын олоҕун көрдөрдө.
Бороҕон лидерэ Анна Винокурова эдэрдэр тыа хаһаайыстыбатын салаатыгар ылсан үлэлииллэрин, ону тэҥэ нэһилиэккэ ыытыллар тэрээһиннэргэ көхтөөх кыттыыны ылалларын кэпсээтэ. Инники былааннарыгар "Зарница" оонньуута, волонтерство тэриллиэхтээҕин иһитиннэрдэ.
Улуус баһылыгын бастакы солбуйааччыта Николай Асаев бары нэһилиэк эдэр ыччатын хамсааһыннарын, биир киһи курдук үлэлииллэрин истэн, астыммытын, үөрбүтүн биллэрдэ.
Тиксии волонтера Анна Слепцова төгүрүк остуолтан туора турбакка кэлэн кыттыыны ылан бэйэтин санаатын иһитиннэрдэ.
Улуус тэрилтэлэрин салайааччылара уонна үлэһиттэрэ: Егор Данилов, Чокуур Капитонов, Василий Баланов, Владимир Милославскай уонна Иосиф Васильев үлэлэригэр эдэр ыччакка аналлаах туох саҥа сүүрээннэр киирбиттэрин кылгастык билиһиннэрдилэр.
Кэпсэтии түмүгүнэн сэбиэт маннык быһаарыылары ылынна: түмсүүлэр национальнай үгэстэргэ, спортивнай көрүҥнэргэ болҕомто ууралларыгар, улууска эдэр ыччат үлэлээх буолуутун тэрийэргэ уонна туризм хайысхатын сайыннарарга.
Аан маҥнай ыытыллыбыт төгүрүк остуол кэпсэтиитин бэтэрээннэр Сэбиэттэрин бэрэссэдээтэлэ Марфа Филиппова “уруй-туску” тылынан түмүктээтэ.
Харысхан ПОПОВ
Фото автора