Агафья Казанова: Бэйэм билиибин үллэстэрбиттэн үөрэбин
Саха Өрөспүүбүлүкэтин үлэ уонна социальнай сайдыы министиэристибэтин үлэһиттэрэ сылын ахсын өрөспүүбүлүкэ араас улуустарыгар баар тэрилтэлэрин кадрдарын кытта үлэлэһэр салааларыгар бэрэбиэркэ ыыталлар.
Тиксиигэ нэдиэлэ саҕаланыыта Саха Өрөспүүбүлүкэтин үлэ уонна социальнай сайдыы министиэристибэтин судаарыстыбаннай сулууспа уонна кадровай политика сүрүн специалиһа Казанова Агафья Александровна министиэристибэҕэ бас бэринэр тэрилтэлэргэ, кадрдары кытта үлэлэһэр салааларыгар бэрэбиэркэ ыытта.
“Биһиги манна икки тэрилтэбит үлэлиир. Ол курдук, Чокуур Капитонов салайааччылаах оройуон нэһилиэнньэтин социальнай харалтаҕа уонна үлэҕэ управленията уонна Марианна Камынина салайааччылаах кырдьаҕастар социальнай олохторун-дьаһахтарын усулуобуйатын көрөр киин. Мин сүрүн үлэм, чуолаан кадрдары кытта үлэлэһии буолар”, – диэн Агафья Александровна бэйэтин үлэтин, эбээһинэһин билиһиннэрдэ.
Улуус дьаһалтатын дьиэтигэр муус устар 26 күнүгэр Булуҥнааҕы дьиэ кэргэн уонна оҕоҕо көмөлөһүү отделениетын сэбиэдиссэйэ Татьяна Асаева көрдөһүүтүнэн, Агафья Казанова тэрилтэ үлэһиттэригэр семинар ыытта. Семинарга Тиксии хас биирдии тэрилтэлэриттэн бэрэстэбиитэл кэлэн интэриэһэргиир ыйытыыларын токкоолостулар, сүбэ-ама ыллылар. “Татьяна Николаевна тэрилтэ үлэһиттэригэр көмө, сүбэ биэрэрбэр көрдөспүтэ, ону ылынан бэйэм кыаҕым иһинэн, тугу билэрбин кэпсээтим. Семинарга үксүн үлэ уонна хамнас туһунан ыйытыылар киирбиттэрэ. Мин ити салаанан үлэлээбэт буоламмын, чопчу хоруйдары биэрбэтим. Итиннэ үлэ уонна социальнай сайдыы министиэристибэтэ сөптөөх эппиэти биэриэ диэн кинилэргэ быһаччы тахсалларыгар сүбэлээтим”, – диэн сүбэ мунньах хайдах ааспытын кэпсиир.
Судаарыстыбаннай сулууспа уонна кадровай политика сүрүн специалиһа Булуҥ улууһугар аан маҥнай кэлбитин этэр. Бөһүөлэк олоҕо күөстүү оргуйан олорорун, командировкаҕа кэлээччи дьон олус элбэҕиттэн сөхпүтүн биллэрэр. Хоту дойду салгына киин сир салгыныттан олус уратылааҕын бэлиэтээтэ. “Тиксиигэ маҥнайгыбын кэлбит буоламмын өйбөр-санаабар наһаа үчүгэй өйдөбүллэр хааллылар. Дьоно-сэргэтэ ыалдьытымсахтар, сылаастык көрүстүлэр, бэрэбиэркэ үчүгэйдик ааста, кэлбит сырыым табылынна”, – диэн түмүктээтэ Казанова.
Харысхан ПОПОВ
Ааптар хаартыскаҕа түһэриитэ