Олорор сирбит-уоппут ыраас буолуутугар кыһаллабыт
Экологияны, олорор, уопсай туһаныллар сирдэри тупсарар сыаллаах Тиксиигэ муус устар 28 күнүгэр бары тэрилтэлэргэ “Күөх Саас – 2017” буолан ааста. “Күөх Саас – 2017” – Арассыыйа үрдүнэн экологическэй субуотунньук күнэ. В.И. Вернадскай аатынан экологическэй фонд тэрийбит бырайыага бу сылга муус устар 22-тэн ыам ыйын 22-гэр диэри салҕанан барыа.
Тэрээһиҥҥэ ким баҕалаах кыттара көҥүл. 2017 сылга бырайыакка дойду 80 субъегыттан 3 мөлүйүөн кэриҥэ киһи кыттара күүтүллэр, ол иһигэр биһиги, булуҥнар, эмиэ кыттабыт. Бу олус үтүө дьыала буолар.
Эрдэ үчүгэй күннэр турбут эбит буоллахтарына, чуолаан бу күн тымныы салгыннаах буолан биэрдэ. Бу да сырыыга бөһүөлэкпит тэрилтэлэрэ тымныыттан чаҕыйбакка, биир түмсүүлээхтэрин көрдөрөн, олорор сири тупсарыыга диэн сыаллаах үлэлээтилэр.
Тиксии дьаһалтатын дьиэтин үлэһиттэрэ уонна баҕалаах дьон кыттыыны ылан, киэҥ туттар сирбит – Эйэ болуоссата – элбэх киртэн-хохтон босхолонно. Баһылык бастакы солбуйааччыта Наталья Анисимова бу күн эмискэ тымныйан, сири хаар үллүктүү түһэн ыраастааһыҥҥа эрэйдэри үөскэппитин этэр. Этиллибит туолуохтаах диэн, субуотунньук күнүн көһөрбөтөхтөрүн, арай үөрэҕирии салаатын үлэһиттэрэ уонна оскуола үөрэнээччилэрэ сарсыҥҥы күнүгэр тахсан хомуйуохтаахтарын бэлиэтээтэ.
Улуус социальнай үлэһиттэрэ Ленинскэй уулуссатыттан саҕалаан КСК дьиэтигэр диэри, оҕо былаһааккатын, “Мегафон” дьиэтин таһын ыраастаатылар. Марианна Камынина, Татьяна Асаева: “Биһиги тэрилтэбит үлэһиттэрэ маннык хабааннаах тэрээһиннэргэ хас сылын аайы тахсабыт. Бу субуотунньугу Экология сылыгар аныыбыт. Олохтоохтору уонна ыалдьыттары бөҕү-хаҕы бырахпаттарыгар, сирбитин-уоппутун харыстыырга ыҥырабыт, бэйэбит олорор дьиэбит, оҕолорбут манна улаатыахтара турдаҕа. Улахан, улуу бырааһынньыктары ыраас сирдээх-уоттаах көрсүөххэ уонна кэлэн иһэр маайдааҕы бырааһынньыктарынан бар дьоммутун эҕэрдэлиибит”, – диэн санааларын үллэһиннилэр.
Онтон улуустааҕы библиотека үлэһиттэрэ Морская уулуссаҕа баар Киин библиотека, КБО дьиэтин таһын хомуйдулар. Улуустааҕы Киин библиотека сүрүн дириэктэрэ Людмила Максимова: “Субуотунньук күн бэйэбит үлэлиир тэрилтэбит туһааннаах сирин сарсыардаттан ыраастаан саҕалаабыппыт. Хас сыл аайы маннык субуотунньуктары тэрийэллэрэ наһаа үчүгэй дии саныыбын. Бары биир киһи курдук тахсан бэйэлээх бэйэбит олорор бөһүөлэкпитин хомуйарбыт туох куһаҕаннаах буолуой! Биир да үлэһиппит туора турбакка, бары көхтөөхтүк тахсан чиэспитин биэрдибит, үөрэ-көтө үлэлээн, күммүтүн туһалаахтык атаардыбыт”.
Харысхан ПОПОВ
Ааптар хаартыскаҕа түһэриитэ