Ойуунускай убайбыт улуу айымньыларыгар сүгүрүйэн
Сэтинньи 8 күнүгэр Былатыан Ойуунускай 120 сыллаах ахтыы киэһэтин Саха республикатын культуратын туйгуна, Күһүүр ааҕар балаҕанын сэбиэдиссэйэ Акулина Николаевна Коркина, кини көмөлөһөөччүтэ Евдокия Свинобоева тэрийэн ыыттылар. Бу күн Ойуунускай айымньыларыгар сүгүрүйээччилэр төгүрүк остуол тула олорон сэгэргэстилэр. Акулина Николаевна Платон Слепцов-Ойуунускай айар үлэтин – саханы саха дэппит айымньыларын – сиһилии ырытта. Саас ортолоох, аҕамсыйа барбыт дьон мустубут буоламмыт “Былааһы сэбиэккэ» диэн ырыанан тэрээһини арыйдыбыт, сөбүлээн ааҕар хоһооннорбутун – “Өрүөл кэриэһэ”, “Көҥүл ырыата” о.д.а аахтыбыт. Түмүккэ “Оҕо куйуурдуу турара” уус-уран киинэ көрүүтэ аһаҕас кэпсэтиини таһаарда.
Сэтинньи 11-16 күннэригэр Күһүүр орто оскуолатын үрдүкү сүһүөх кылаас үөрэнээччилэригэр Былатыан Ойуунускай 120 сылыгар аналлаах кылаас чаастара ыытылыннылар. Маны сэргэ Платон Алексеевич Слепцов-Ойуунускай олоҕун, айар үлэтин истиэнэ хаһыат нөҥүө арыйан көрдөрдүлэр. Оҕолор өйтөн суруйуулара, “Улуу убайбыт Былатыан Ойуунускай” диэн ыйытыы-эппиэт оонньуу олус көхтөөхтүк аастылар. Манна кыра саастаахтарга 7 б кылаас үөрэнээччитэ Кэрэчээнэ Корякина “Дьүкээбил” хамаандата кыайыылаах таҕыста. Санатар эбит буоллахха, Кэрэчээнэ 2011 сыллаахха Тааттаҕа “Ийэ тыл” көҥүл түмсүү иһинэн “Алампа аартыгынан” айан делегациятыгар Булуҥ улууһуттан кыттыыны ылбыта.
Кыттааччылар бука бары анал бириистэринэн, махтал суруктарынан наҕараадаланнылар, чуолаан 9 б кылаастан Наташа Шубина, 8 б кылаастан Настя Бетюнская уонна Даша Лаврова, 10 б кылаастан Алена Попова, 11 б кылаастан Туйаара Попова, үөрэн-көтөн тарҕастылар.
Сэтинньи 15 күнүгэр «Ровестник» кулуупка киэһэ 6 чаастан оҕо-аймах, улахан дьон “Эн ааккын ааттатыахпыт” диэн театрдыы дьүһүйүүгэ тоҕуоруһа мустан олус сэргээтилэр. Дьүһүйүү саҕаланыытын саха омук үгэһинэн үҥкүүһүттэр бөлөхтөрө «Чороонноох» үҥкүүнэн арыйдылар, кыргыттар толорууларыгар «Таатта үрэх үрдүгэр» ырыа дьиэрэйдэ, ааҕааччылар толорууларыгар «Үлэһит ырыата», «Сүөкүччэҕэ», «Куоттарбыт кутурҕана», «Ийэм Дьэбдьиэй уҥуоҕар» хоһоннор ааҕылыннылар. «Оҕо куйуурдуу турара» Сааскылаана Корякина, уонна «Кыһыл Ойуун» монологу оскуолаҕа киириэн ннинээҕи саастаах оҕолору иитэр коллектив үлэһитэ Павел Корякин толордулар. Күһүүрдээҕи норуот театрын иһинэн үлэлиир драмкуруһуок оҕолорун толоруутугар «Дьулуруйар Ньургун Боотур» олоҥхоттон быһа тардыы Саха республикатын культуратын туйгуна Раиса Николаевна Бетюнская туруоруутугар көрөөччү дьүүлүгэр таһаардылар. Оҕолор олус кыһаллыбыттар.
Бүтүүтүгэр үөрүү үҥкүүтэ – оһуохай – мустубут дьону түмтэ.
Оҕолорбут, сиэннэрбит төрөөбүт тылы үөрэтии эйгэтигэр киэҥ билиилээх, саҥа көрүүлээх, сайдыылаах дьон буола улааталларыгар өрүү күүс-көмө буолуоҕуҥ.
Лидия ТОГУЛЛАХОВА,
Күһүүр, общкорр.