Нэһилиэктэргэ отчуоту күүтэллэр
КҮҺҮҮР. Биһиги улууспутугар олунньу ыйга улахан тымныылар турдулар, ол курдук Күһүүр нэһилиэгэр – 58 кыраадыска тиийэ халлаан тымныйда. Олохтоох дьаһалта баһылыга А.Н.Винокурова кэпсииринэн, хочуолунайдар, ититэр систиэмэлэр саахала суох үлэлээн, бу тымныылары этэҥҥэ туораан эрэллэр. Бу тымныылартан сибээстээн оскуолаҕа үөрэх тохтоон, ону тэҥэ бөртөлүөт көппөккө Сииктээх нэһилиэгиттэн Күһүүргэ үөрэнэр оҕолор, дьэ, кэллилэр.
Бөртөлүөт көттөҕүнэ тоҕус уол призыв иннинээҕи хамыыһыйаны бара тиксиилиэхтээхтэр.
НАЙБА. Муустаах муора биэрэгэр сытар Найба бөһүөлэгэр улахан тымныылар түспэтилэр. Олохтоох дьаһалта баһылыгын солбуйааччы В.В. Спиридонов: “Бөһүөлэкпитигэр олох-дьаһах кэминэн. Өрөспүүбүлүкэбит бырабыытылыстыбатын отчуотун уонна үөрэҕирии салаатынан Дьокуускайтан Рособрнадзор хамыыһыйатын күүтэбит”.
Таймылыыр. “Этэҥҥэбит. Барыта биэс хочуолунай үлэлии турар. Бэһис хочуолунай бу тымныыларга эбии холбоммута. Улахан тымныылар түһэннэр, оҕолор кыһыҥҥы каникулларын кэннэ үөрэнэ иликтэр.
Олохтоох дьаһалта отчуота ааспыт ыйга буолан ааста, онтон улуус дьаһалтатын отчуотун бу ый 11-12 күннэригэр, онтон Өрөспүүбүлүкэбит бырабыытылыстыбатын кулун тутар 11-14 күннэригэр күүтэбит. Ону тэҥэ бөртөлүөт көттөҕүнэ, уон уол призыв иннинээҕи хамыыһыйаны бара Тиксиигэ көтүөхтээхтэр,” – диэн кэпсиир олохтоох дьаһалта специалиһа Е.В.Петрова.
Бэлэмнээтэ Евдокия БАИШЕВА