Булчуттар оонньуулара Арктика уонна Культура сылыгар ананна
Кулун тутар 29 күнүгэр Тиксии буухтатыгар «Булчуттар оонньуулара» буолан ааста. Үс хамаанда күрэхтэстэ. Спортивнай оонньуулар сэттэ көрүҥтэн турдулар: маамыкта быраҕыыта, ханаат тардыһыыта, сүгэ быраҕыыта, ууну түргэнник оргутуу, эстафета, сыарҕа соһуута уонна ойбон алларыыта.
Маамыкта быраҕыытыгар уонна эстафетаҕа «Бэргэн» хамаандата бастаата. Ханаат тардыһыытыгар, сүгэ быраҕыытыгар, ууну түргэнник оргутууга, ойбон алларыытыгар «Тиксинское» хамаанда тэҥнээхтэрин булбата.
«Хотулар» хамаанда кырдьык да ааттыын хоту дойду олохтоохторун сылбырҕа-сыыдам сырыыларын сыарҕа соһуутугар көрдөрдүлэр.
Саамай бэһиэлэй күрэх «Ойбон алларыыта», бу көрөөччүлэр болҕомтолорун тарта. Хамаандалар ыалдьааччылара бэйэлэрин дьонноругар ыһыы-хаһыы бөҕө.
Салгыы киэһэ сэттэ чаастан «Айхал» этно-культурнай кииҥҥэ хас биирдии хамаанда талааннарын арыйан сыанка туруоран, араас көрүдьүөс оруолларга оонньоон көрдөрдүлэр. Түмүгэр «Бэргэн» хамаанда инники таҕыста.
Уопсай түмүккэ «Бэргэн» хамаанда кыайыы өрөгөйүн билэн, 24 тыһыынча сууммалаах сертификатынан наҕараадаланна. Иккис бириистээх миэстэҕэ «Хотулар» 18 тыһыынча сууммалаах сертификат ылан үөрдүлэр-көттүлэр. «Тиксинское» хамаанда үһүс бочуоттаах миэстэҕэ тахсан, кинилэргэ 12 тыһыынчалаах сертификат туттарылынна. Бу бириистэри барытын Саха Республикатын булка хаһаайыстыбатын Департамена уйунна. Айылҕа харыстабылын Булуҥнааҕы инспекцията бэйэтин анал бирииһин спортивнай күрэхтэһиилэргэ бастаабыт «Тиксинское» хамаандаҕа туттарда.
Бу күрэх Арктика уонна Культура сылыгар ананан, Тиксии бөһүөлэгэр аан бастаан ыытылынна. Күрэххэ аҕалар оҕолорун илдьэ кэлбиттэрэ олус үчүгэй. Бу оҕоҕо кыра сааһыттан булчут сүрүн хаачыстыбаларын билэригэр олук уурар күрэх буолан ааста.
Булуҥ улууһун Айылҕа харыстабылыгар инспекциятын салайааччыта Иннокентий Иннокентьевич Стручков «Булчуттар оонньуулара» күрэх туһунан санаатын үллэһиннэ:
– Тэрээһинэ үчүгэй. Күрэххэ көрөөччүлэр өссө ордук көхтөөхтөрө буоллар, ол кыттааччыларга күүс-көмө буолуо этэ. Техника баара буоллар эбэтэр чугастыы буолбута буоллар дьон-сэргэ мустуо эбит.
Харысхан ПОПОВ.
Автор хаатыскаҕа түһэриитэ